Hormuz bo‘g‘ozida yuk tashuvlari 30 kun ichida tiklanishi mumkin — Washington Post
Ma’lumotlarga ko‘ra, AQSh va Eron sulhni 60 kunga uzaytirish bo‘yicha kelishuv loyihasi ishlab chiqqan.
Washington Post (WP) nashri yuqori lavozimli rasmiylarga tayanib xabar berishicha, AQSh va Eron o‘rtasida sulhni 60 kunga uzaytirish hamda Hormuz bo‘g‘ozini qayta ochishni nazarda tutuvchi kelishuv loyihasi ishlab chiqilgan.
Ma’lumotlarga ko‘ra, tayyorlangan o‘zaro anglashuv memorandumi tomonlarga yakuniy kelishuvga erishilgunga qadar vaqtinchalik sulhni uzaytirish imkonini beradi. Shu bilan birga, hujjatda Hormuz bo‘g‘ozida minalarni tozalash va dengiz yo‘llarini qayta ochish choralari ham ko‘zda tutilgan.
Gazeta manbalariga ko‘ra, taklifning so‘nggi versiyasi Eron tomonidan tasdiqlanishi kutilmoqda. Rasmiylar esa hozircha hech qanday yakuniy kelishuv imzolanmaganini ta’kidlamoqda.
Shuningdek, hujjatda Eron, AQSh va ularning ittifoqchilari barcha frontlarda harbiy harakatlarni darhol to‘xtatishi, Hormuz bo‘g‘ozida yuk tashish hajmini 30 kun ichida urushdan oldingi darajaga qaytarish bo‘yicha choralar ko‘rishi nazarda tutilgan.
Diplomatik manbalarga ko‘ra, kelishuvga Eronning yadroviy qurol ishlab chiqarmaslik majburiyati hamda boyitilgan uran zaxiralarini kelishilgan mexanizm asosida yo‘q qilish masalalari kiritilgan.
