Putin Toqayev taklifiga binoan Qozog‘istonga boradi
Tashrif doirasida Rossiya prezidenti Qozog‘istonda Yevrosiyo iqtisodiy forumi va oliy kengash yig‘ilishida ishtirok etadi.
Vladimir Putin Qozog‘iston Prezidenti Qosim-Jomart Toqayevning taklifiga binoan 27–29 may kunlari Qozog‘istonga rasmiy tashrif bilan boradi.
Qozog‘iston Prezidenti matbuot xizmati ma’lumotiga ko‘ra, tashrif davomida ikki davlat rahbarlari o‘rtasida muzokaralar o‘tkazilishi rejalashtirilgan. Unda Qozog‘iston va Rossiya o‘rtasidagi keng qamrovli strategik sheriklik hamda ittifoqchilik munosabatlarining bugungi holati, savdo-iqtisodiy, siyosiy va mintaqaviy hamkorlikni yanada rivojlantirish istiqbollari muhokama qilinadi.
Shuningdek, tashrif doirasida 28-may kuni Yevrosiyo iqtisodiy forumi bo‘lib o‘tadi. Forumda Yevrosiyo iqtisodiy ittifoqiga a’zo davlatlar rahbarlari ishtirok etishi kutilmoqda. 29-may kuni esa Oliy Yevrosiyo iqtisodiy kengashining navbatdagi yig‘ilishi o‘tkaziladi.
Ma’lum qilinishicha, Putin fevral oyida Toqayev bilan telefon orqali muloqot chog‘ida Qozog‘istonga tashrif buyurish taklifini qabul qilgan. Rossiyaning Ostonadagi elchisi Aleksey Borodavkinning ta’kidlashicha, ikki davlat rahbarlari o‘rtasidagi muntazam oliy darajadagi tashriflar an’anaviy tus olgan.
Eslatib o‘tamiz, may oyi boshida Toqayev Moskvaga tashrif buyurib, G‘alaba kuni tadbirlarida ishtirok etgan edi.
