Maxsus komissiya Toshkentda qisqa muddatli chang-to‘zon hodisalari yuzasidan ogohlantirdi

 

Jahon meteorologiya tashkilotining Chang-qum bo‘ronlari bo‘yicha Pekin va Saudiya Arabistoni regional markazlari hamda O‘zbekiston Gidrometeorologiya xizmati agentligi prognozlariga ko‘ra, ertaga poytaxt hududiga g‘arbiy nam havo oqimlari kirib kelishi oldidan ayrim hududlarda chang-to‘zon hodisalari yuz berishi ehtimoli mavjud.

 

Prognozlarga ko‘ra, kun davomida ob-havo o‘zgaruvchan bo‘ladi, ayrim joylarda qisqa muddatli yomg‘ir yog‘ishi va momaqaldiroq kuzatilishi mumkin. Shamol asosan g‘arbdan 3–8 metr/sekund tezlikda esadi. Ayrim hududlarda shamol tezligi 10–12 metr/sekundgacha, ba’zi joylarda esa 15 metr/sekundgacha kuchayishi mumkin.

 

Mutaxassislar ma’lumotiga ko‘ra, kuchli shamol fonida ayrim hududlarda chang-to‘zonlar yuzaga kelishi hamda atmosfera havosida chang zarrachalari, xususan PM10 konsentratsiyasi qisqa muddatga oshishi ehtimoli mavjud.

 

Shu bilan birga, ushbu holat qisqa muddatli xarakterga ega ekani, g‘arbiy nam havo oqimlari va yog‘ingarchilik sabab atmosfera havosi asta-sekin tozalanishi kutilayotgani ta’kidlandi.

 

Mutaxassislar shamol kuchaygan paytlarda, ayniqsa nafas yo‘llari kasalliklari, allergiya yoki yurak-qon tomir tizimi bilan bog‘liq muammolari mavjud fuqarolarga ehtiyot choralarini ko‘rishni tavsiya etdi. Zarurat bo‘lmaganda uzoq vaqt ochiq havoda bo‘lmaslik, deraza va eshiklarni yopiq saqlash hamda imkon qadar niqoblardan foydalanish maqsadga muvofiq ekani bildirildi.

 

Hozirda atmosfera havosi holati Maxsus komissiya tomonidan doimiy monitoring qilinmoqda.