O‘zbekiston tashqi ishlar vaziriga yangi o‘rinbosar tayinlandi
Mirvohid Azimov bungacha Turkiy davlatlar tashkiloti bosh kotibining o‘rinbosari lavozimida faoliyat yuritgan.
Shavkat Mirziyoyevning 26-maydagi qarori bilan Mirvohid Mirilyasovich Azimov O‘zbekiston tashqi ishlar vazirining o‘rinbosari lavozimiga tayinlandi.
O‘zbekiston Tashqi ishlar vazirligi matbuot xizmati ma’lum qilishicha, Mirvohid Azimov 26-may kuni vazirlik jamoasiga tanishtirilgan.
46 yoshli diplomat 2020-yil kuzidan buyon Turkiy davlatlar tashkiloti bosh kotibi o‘rinbosari lavozimida ishlab kelayotgan edi.
Mirvohid Azimov Jahon iqtisodiyoti va diplomatiya universitetining xalqaro huquq yo‘nalishi bo‘yicha bakalavriat va magistratura bosqichlarini tamomlagan. U yuridik fanlar nomzodi hisoblanadi.
Shuningdek, u Tashqi ishlar vazirligi tizimida 20 yildan ortiq tajribaga ega bo‘lib, 4 yil davomida Pekin shahridagi Shanxay hamkorlik tashkiloti kotibiyatida ishlagan. Turli yillarda Tashqi ishlar vazirligining Shartnoma-huquqiy boshqarmasiga ham rahbarlik qilgan.
