Toshkentda reklama taxtalarini noqonuniy olib qo‘ygan xodimlar javobgarlikka tortildi
Biznes-ombudsman aralashuvidan so‘ng plakatlar tadbirkorlarga qaytarildi.
Toshkent shahrida ayrim tadbirkorlarga tegishli ko‘chma reklama taxtalarini noqonuniy olib ketgan xodimlar ma’muriy javobgarlikka tortildi. Bu haqda Biznes-ombudsman ma’lum qildi.
Qayd etilishicha, ijtimoiy tarmoqlarda tadbirkorlik subyektlarining reklama taxtalari ogohlantirishsiz olib ketilgani haqidagi xabarlar tarqalganidan so‘ng holat nazoratga olingan.
O‘rganishlar davomida Yakkasaroy tumanida faoliyat yurituvchi “CH.Z.” MChJ va boshqa tadbirkorlarga tegishli reklama taxtalari tuman Obodonlashtirish boshqarmasi xodimlari tomonidan asossiz ravishda yig‘ishtirib olib ketilgani aniqlangan.
Biznes-ombudsman aralashuvidan so‘ng reklama plakatlari tadbirkorlarga qaytarildi. Noqonuniy harakatlarga yo‘l qo‘ygan Obodonlashtirish boshqarmasining ikki nafar mas’ul xodimi esa ma’muriy javobgarlikka tortilgan.
Biznes-ombudsman tadbirkorlik subyektlarining mulki qonun bilan himoya qilinishi va unga noqonuniy aralashuv ma’muriy yoki jinoiy javobgarlikka sabab bo‘lishini eslatib o‘tdi.
