WTA va O‘zbekiston: turizm sohasida yangi imkoniyatlar muhokama qilindi
WTA tarkibidagi 260 dan ortiq turizm tashkilotlari va kompaniyalarini O‘zbekistondagi loyihalarga jalb qilish hamda Ipak yo‘li targ‘iboti tadbirlarini o‘tkazish kelishib olindi.
“ITB China” xalqaro turizm ko‘rgazmasi doirasida Turizm qo‘mitasi raisi A. Aqqulov “World Tourism Alliance” (WTA) bosh kotibi Zheng Hao bilan uchrashuv o‘tkazdi.
WTA turizm sohasidagi xalqaro nodavlat va notijorat tashkilot bo‘lib, u davlatlar, xususiy sektor va turizm industriyasi ishtirokchilari o‘rtasida hamkorlikni keng yo‘lga qo‘yish bo‘yicha faoliyat ko‘rsatadi.
Bugungi muzokaralarda WTA bilan hamkorlikda O‘zbekistonning turistik salohiyatini xalqaro maydonda keng targ‘ib qilish, jumladan, Samarqand, Buxoro va Xiva kabi tarixiy shaharlarning jahon turistik marshrutlaridagi o‘rnini yanada mustahkamlashga qaratilgan yangi loyihalarni amalga oshirish muhokama qilindi.
Shu bilan birga, WTA platformasi orqali O‘zbekistonga xorijiy investitsiyalar va yangi turistik loyihalarni jalb etish imkoniyatlari ham ko‘rib chiqilmoqda. Ekologik turizm, ziyorat turizmi va gastronomik turizm kabi yo‘nalishlarni xalqaro hamkorlik asosida rivojlantirish ilgari surilmoqda.
Uchrashuv yakuniga ko‘ra, WTA tarkibiga kiruvchi 260 dan ortiq milliy turizm tashkilotlari, aviakompaniyalar, mehmonxona tarmoqlari va yirik turizm kompaniyalarini O‘zbekistonda amalga oshirilayotgan loyihalarga keng jalb qilish va birgalikda Ipak Yo‘li targ‘ibotiga bag‘ishlangan tadbirlarni amalga oshirishga kelishib olindi.
Qayd etilishicha, O‘zbekistonning global turistik tashkilotlar bilan aloqalarini kuchaytirilishi mamlakatning xalqaro imijini yanada oshiradi. Bu esa nafaqat sayyohlar oqimini ko‘paytirish, balki yangi ish o‘rinlari yaratish va hududiy iqtisodiyotni rivojlantirishga ham hissa qo‘shadi.
