Qirg‘iziston-O‘zbekiston chegarasida yangi chegara posti ochildi
Ushbu hududdagi chegarachilar ikki davlat chegarasining 12 kmdan ortiq qismini qo‘riqlaydi.
Qirg‘izistonning Batken viloyatida O‘zbekiston bilan chegarada joylashgan “Sog‘ment” yangi chegara posti foydalanishga topshirildi. Bu haqda 24.kg xabar berdi.
Rasmiylar yangi chegara posti ochilishi davlat xavfsizligini mustahkamlash hamda chegara hududlarida barqarorlikni ta’minlashdagi muhim qadam ekanini ta’kidlagan.
Bildirilishicha, “Sog‘ment” chegara postida harbiy xizmatchilar uchun barcha zarur sharoitlar yaratilgan. Zamonaviy talablarga javob beradigan kazarma qurilib, xizmatni olib borish uchun kerakli infratuzilma bilan ta’minlangan.
Qayd etilishicha, ushbu hududdagi chegarachilar Qirg‘iziston–O‘zbekiston davlat chegarasining 12 kilometrdan ortiq qismini qo‘riqlaydi.
Shuningdek, shu kuni Qirg‘izistonning boshqa hududlarida ham bir nechta chegara postlari foydalanishga topshirilgani ma’lum qilindi.
