Fransiyada Chempionlar ligasi finalidan keyingi tartibsizliklar sabab yuzlab odamlar hibsga olindi
Futbol muxlislari va politsiya o‘rtasidagi to‘qnashuvlarda jami 219 kishi jarohatlangan. Ulardan sakkiz nafari og‘ir ahvolda.
Fransiyada “Pari Sen-Jermen” (PSJ) futbol klubining Chempionlar ligasi finalidagi g‘alabasidan so‘ng yuz bergan ommaviy tartibsizliklar oqibatida yuzlab odamlar qo‘lga olindi. Bu haqda BBC xabar berdi.
Fransiya ichki ishlar vaziri Loran Nunesning ma’lum qilishicha, mamlakat bo‘ylab futbol muxlislari va politsiya o‘rtasidagi to‘qnashuvlarda jami 219 kishi jarohatlangan. Ulardan sakkiz nafari og‘ir ahvolda. Shuningdek, 57 nafar politsiya xodimi ham tan jarohati olgan.
Rasmiy ma’lumotlarga ko‘ra, zo‘ravonliklar bilan bog‘liq holatlar yuzasidan 780 kishi qo‘lga olingan, ulardan 450 nafardan ortig‘i hibsda saqlanmoqda.
Tartibsizliklar asosan Parij shahrida kuzatilgan. Muxlislar ko‘chalarda mash’alalar yoqib, ayrim do‘konlarga zarar yetkazgan. Vaziyatni nazorat qilish uchun politsiya ko‘zdan yosh oqizuvchi gaz qo‘llagan.
Hodisalar oqibatida Parij aylanma yo‘li yaqinida bir kishi halok bo‘lgan. Ayrim ma’lumotlarga ko‘ra, 24 yoshli yigit mototsiklda harakatlanayotib beton to‘siqqa urilgan. Shuningdek, shaharning boshqa hududida sodir bo‘lgan mushtlashuv natijasida bir o‘smir og‘ir ahvolda qolmoqda.
Parijda o‘tkazilgan g‘alaba paradining xavfsizligini ta’minlash uchun 6 ming nafar politsiyachi safarbar etildi. Bayram tadbirlari Eyfel minorasi atrofida va shahar markazida davom etdi.
Fransiya ichki ishlar vazirligi tartibsizliklarni keltirib chiqarganlarning aksariyati futbol muxlislari emasligini ta’kidlab, jamoat tartibini buzishga uringan shaxslarga nisbatan qat’iy choralar ko‘rilishini ma’lum qildi.
