O‘zbekistonda bolalarni yozgi oromgohlarga olib boradigan avtobuslar texnik ko‘rikdan o‘tkazildi
Oromgohlarga olib boruvchi 3411,6 kilometr uzunlikdagi avtomobil yo‘llari ham tekshirildi.
Yo‘l harakati xavfsizligi xizmati ma’lumotiga ko‘ra, 2026-yilda respublika bo‘yicha 179 ta statsionar oromgoh hamda 1242 ta maktabdagi sog‘lomlashtirish maskanlarida jami 314 ming 190 nafar bolaning dam olishi rejalashtirilgan.
Bolalarning xavfsizligini ta’minlash maqsadida oromgohlarda 692 nafar yo‘l patrul xizmati xodimi xizmat olib boradi. Shuningdek, bolalarni tashish uchun jalb etilgan 1121 ta avtobusning texnik holati tekshirilib, mavsumga tayyorlangan.
YHXX ma’lumotlariga ko‘ra, oromgohlarga olib boruvchi 3411,6 kilometr uzunlikdagi avtomobil yo‘llari ham ko‘rikdan o‘tkazilgan. Aniqlangan kamchiliklarni bartaraf etish yuzasidan mas’ul tashkilotlarga taqdimnomalar kiritilgan.
Tayyorlov ishlari doirasida yo‘llarga 1297 ta yangi yo‘l belgisi o‘rnatilib, yaroqsiz holga kelgan belgilar almashtirilgan. Bundan tashqari, 244 ming kvadrat metrdan ortiq piyodalar o‘tish joylariga yo‘l chiziqlari chizilgan, 134 ming kvadrat metrdan ziyod yo‘l qismi ta’mirlangan.
Amaldagi tartibga ko‘ra, bolalar guruhlarini oromgohlarga tashish yo‘l-patrul xizmati xodimlari kuzatuvi ostida amalga oshiriladi.
Yo‘l harakati xavfsizligi xizmati ota-onalarni yozgi ta’til davrida farzandlarini qarovsiz qoldirmaslikka, ularning yo‘l harakati qoidalariga rioya etishini nazorat qilishga hamda transport vositalarini voyaga yetmaganlarga boshqarish uchun bermaslikka chaqirdi.
Shuningdek, bolalarni issiq havoda avtomobilda yolg‘iz qoldirmaslik va yo‘l harakati xavfsizligi qoidalariga amal qilish zarurligi eslatildi.
