Starlink tizimi hujumlar uchun ishlatilmasligi kerak — Mask
Uning fikricha, sun’iy yo‘ldoshlarning yo‘q qilinishi kosmosda katta miqdordagi chiqindilar paydo bo‘lishiga olib kelishi mumkin.
SpaceX kompaniyasi rahbari Ilon Mask Starlink sun’iy yo‘ldosh aloqa tizimidan hujumkor amaliyotlarda foydalanish xavfli oqibatlarga olib kelishi mumkinligini aytdi. Uning ta’kidlashicha, tizim harbiy infratuzilma sifatida ishlatilishi mumkin, biroq hujumlar uchun qo‘llanishi uni javob zarbalari uchun qonuniy nishonga aylantirishi ehtimoli bor.
Mask bu haqda 25-oktabr kuni X ijtimoiy tarmog‘ida yozgan. Uning fikricha, Starlink sun’iy yo‘ldoshlariga zarba berilishi kosmosda katta miqdordagi chiqindilar hosil bo‘lishiga va jiddiy oqibatlarga olib kelishi mumkin.
“Agar dushman Starlink sun’iy yo‘ldoshlarini portlatsa, bu ulkan vayronagarchilik maydonini yaratib, kosmosni yaroqsiz holga keltiradigan domino effektiga olib keladi”, — degan u.
Maskning ta’kidlashicha, Starlink’dan harbiy infratuzilma doirasida foydalanish mumkin, ammo tizimni javob zarbalari uchun qonuniy nishonga aylantirishi mumkin bo‘lgan hujumkor harakatlarda qo‘llash kerak emas.
Avvalroq, 24-oktabr kuni tadbirkor Ukraina Qurolli kuchlari Starlink’dan hujumkor dronlarni boshqarishda foydalanganini va bu tizimdan foydalanish shartlariga zid ekanini da’vo qilgan edi. Maskning aytishicha, bunday foydalanish imkoniyati o‘tgan hafta cheklangan.
Shuningdek, u Starlink xizmatlari to‘xtatilgan taqdirda, Ukraina frontidagi vaziyatga jiddiy ta’sir ko‘rsatishi mumkinligini ta’kidlagan.
