PSJ Chempionlar ligasida ketma-ket ikkinchi bor g‘olib bo‘ldi
Finalda “Arsenal” bilan durang (1:1) qayd etgan parijliklar penaltilar seriyasida 4:3 hisobida ustun keldi.
Fransiyaning “Pari Sen-Jermen” (PSJ) klubi UEFA Chempionlar ligasining navbatdagi mavsumida ham bosh sovrinni qo‘lga kiritdi. Parijliklar final uchrashuvida Londonning “Arsenal” jamoasini penaltilar seriyasida mag‘lub etib, ketma-ket ikkinchi marta Yevropaning eng nufuzli klub turniri g‘olibiga aylandi.
Hal qiluvchi bahs keskin kurashlar ostida o‘tdi. Uchrashuvning 6-daqiqasidayoq “Arsenal” hujumchisi Kay Haverts hisobni ochib, ingliz klubini oldinga olib chiqdi.
PSJ ikkinchi bo‘limda muvozanatni tiklashga muvaffaq bo‘ldi. 65-daqiqada Usmon Dembele Xvicha Kvaratsxeliyaga nisbatan ishlatilgan qoida buzilishi uchun belgilangan penaltini aniq amalga oshirib, hisobni tenglashtirdi.
Asosiy va qo‘shimcha bo‘limlarda g‘olib aniqlanmagach, final taqdiri penaltilar seriyasida hal bo‘ldi. Bu safar PSJ futbolchilari aniqroq harakat qilib, 4:3 hisobida ustun keldi.
Ma’lumot uchun, Chempionlar ligasi va Yevropa chempionlari kubogi tarixida final uchrashuvi 11 marta penaltilar seriyasigacha yetib borgan.
O‘tgan mavsumda ham PSJ tarixida ilk bor Chempionlar ligasi bosh sovrinini qo‘lga kiritgan edi.
Parijliklar finalda Milanning “Inter” klubini 5:0 hisobida mag‘lub etib, turnir finallari tarixidagi eng yirik g‘alabalardan biriga mualliflik qilgandi.
Shuningdek, PSJ joriy mavsumda ketma-ket beshinchi bor Fransiya Birinchi ligasi chempionligini ham qo‘lga kiritdi.
