Eron AQSh bilan foydali kelishuv tuzishga tayyor — Tramp
AQSH prezidenti muzokaralarga ichki siyosiy bosimlar ta’sir ko‘rsatayotganini aytib, demokratlar va respublikachilarni tanqid qildi.
AQSh prezidenti Donald Tramp Eronning AQSh bilan ijobiy kelishuvga erishish istagi borligini bildirgan.
Trampning Truth Social platformasida yozishicha, Eron Qo‘shma Shtatlar bilan tinchlik shartnomasini imzolashga chin dildan sodiq bo‘lib, ushbu kelishuv Vashington va uning ittifoqchilari uchun foydali bo‘lishi mumkin.
Shuningdek, AQSh prezidenti kelishuv jarayoniga ichki siyosiy bosimlar to‘sqinlik qilayotganini ta’kidlab, demokratlar hamda ayrim respublikachi siyosatchilarni tanqid qilgan. Uning so‘zlariga ko‘ra, bu omillar muzokaralar jarayonini murakkablashtirmoqda.
OAV xabarlariga ko‘ra, jumladan The New York Times va Axios nashrlari AQSh Eron bilan bo‘lishi mumkin bo‘lgan kelishuv shartlarini qat’iylashtirish masalasini ko‘rib chiqayotganini ma’lum qilgan. Xususan, uranni boyitish va zaxiralarni cheklash bo‘yicha bandlar muhokama qilinmoqda.
Shuningdek, AQSh moliya vaziri Skot Bessent Vashington Eron bilan muzokaralarda harbiy va iqtisodiy bosim vositalaridan foydalanishi mumkinligini bildirgan.
