Qirg‘izistonning O‘zbekistondagi sobiq elchisining qizi hibsga olindi

 

Qirg‘izistonning O‘zbekistondagi sobiq elchisi, shuningdek avval qishloq xo‘jaligi vaziri bo‘lib ishlagan Emilbek Uzoqboyevning qizi Meerim Uzoqboyeva davlat mulkini xususiylashtirish jarayonlari bilan bog‘liq korrupsiya gumoni asosida hibsga olindi. Bu haqda 24.kg nashri xabar berdi.

 

Mazkur holat Qirg‘izistonda “75 maktub” deb nomlangan keng ko‘lamli tergov doirasida ko‘rib chiqilmoqda. Tergov materiallariga ko‘ra, ish 30 yil avval amalga oshirilgan xususiylashtirish jarayonlarini qayta o‘rganishga qaratilgan bo‘lib, Bishkek shahrida joylashgan “Qirg‘izoyilkomok” kompaniyasi faoliyati ham tekshiruv ostiga olingan.

 

Ma’lumotlarda qayd etilishicha, ushbu kompaniya aksiyalarining 63 foizi Uzoqboyevlar oilasi nazoratida bo‘lib, 1993-yilda boshlangan xususiylashtirish jarayonida Emilbek Uzoqboyev dastlab 0,5 foiz ulushni xarid qilgan. Keyingi yillarda u boshqa aksiyadorlardan ulushlarni bosqichma-bosqich sotib olib, kompaniyada asosiy nazorat paketiga ega bo‘lgan.

 

Himoya tomonining bildirishicha, Meerim Uzoqboyeva o‘sha davrda voyaga yetmagan (10 yosh) bo‘lgan va u xususiylashtirish jarayonlarida bevosita ishtirok etmagan. Shuningdek, u faqat 2017-yildan boshlab kompaniya bosh direktori lavozimida faoliyat yuritgan.

 

Advokatning ta’kidlashicha, ish yuzasidan bir qator holatlar huquqiy jihatdan bahsli bo‘lib qolmoqda. Uning so‘zlariga ko‘ra, ayrim holatlar huquqni qo‘llash amaliyotida ikki xil yondashuv mavjudligini ko‘rsatishi mumkin.

 

Shuningdek, himoya tomoni mazkur ishda korruptsiyada gumon qilinayotgan ayrim shaxslar erkinlikda qolayotgani, voyaga yetmagan farzandlari bor yolg‘iz ona esa hibsga olinganini ta’kidlab, bu holat yuzasidan adolatli va xolis yondashuv zarurligini bildirgan.