Sergeli avtomobil bozori buzilmaydi — hokimlik
Bozorda keng ko‘lamli modernizatsiya va obodonlashtirish ishlari amalga oshirilmoqda.
Sergeli avtomobil bozori o‘z faoliyatini odatiy tartibda davom ettirmoqda va uning buzilishi yoki yopilishi haqidagi xabarlar haqiqatga mos kelmaydi. Bu haqda tuman hokimligi xabar berdi.
Ma’lum qilinishicha, avtomobil bozori hududida sotuvchilar, xaridorlar hamda tashrif buyuruvchilar uchun qulay sharoitlarni yanada yaxshilashga qaratilgan keng ko‘lamli modernizatsiya va obodonlashtirish ishlari amalga oshirilmoqda.
Olib borilayotgan ishlarning asosiy maqsadi bozor infratuzilmasini yangilash, xavfsiz, zamonaviy va tartibli savdo muhitini yaratish, shuningdek, aholiga ko‘rsatilayotgan xizmatlar sifatini oshirishdan iborat.
Modernizatsiya ishlari doirasida bozor ma’muriy binolarining kirish qismlari yangilanmoqda hamda granit plitalar yotqizilmoqda. Shu bilan birga, hududning 26 500 kvadrat metr maydoniga yangi asfalt qoplamasi yotqizilgan bo‘lib, qo‘shimcha 16 200 kvadrat metr maydonni asfaltlash rejalashtirilgan.
Shuningdek, ehtiyot qismlar savdosi amalga oshiriladigan do‘konlarning tom qismlarini yangilash ishlari olib borilmoqda. Hududdagi tartibsiz joylashtirilgan reklama konstruksiyalari demontaj qilinib, savdo nuqtalarining tashqi ko‘rinishi tartibga keltirilmoqda. Foydalanilgan ehtiyot qismlar sotiladigan konteynerlar ham zamonaviy va tartibli ko‘rinishga keltirilmoqda.
Bundan tashqari, bozor hududiga avtomototransport vositalarining kirishi uchun inson omilisiz ishlovchi avtomatlashtirilgan to‘lov tizimlari o‘rnatilmoqda.
Hokimlik mazkur ishlar bozor faoliyatini to‘xtatish bilan bog‘liq emasligini alohida ta’kidlab, aksincha, bu tashabbuslar hududni rivojlantirish, tadbirkorlar uchun sharoitlarni yaxshilash hamda poytaxt aholisi uchun yanada qulay savdo muhitini yaratishga xizmat qilishini qayd etdi.
