Xodimni pora olmagani uchun mukofotlash huquqiy jihatdan noto‘g‘ri — Antikorrupsiya agentligi
Qonun ustuvorligining ta’minlanishi xodimlarning funksional majburiyati ekani bildirildi.
Huquqni muhofaza qiluvchi organlar xodimlarini pora olishdan voz kechgani uchun rag‘batlantirish tartibi jamoatchilik orasida bahs-munozaralarga sabab bo‘ldi. Korrupsiyaga qarshi kurashish agentligi esa bu boradagi tanqidlarni asosli deb hisoblab, amaldagi tartibni qayta ko‘rib chiqish bo‘yicha o‘zgartirishlar tayyorlanayotganini ma’lum qildi. Bu haqda Gazeta.uz xabar berdi.
Ma’lum qilinishicha, agentlik huquqni muhofaza qiluvchi organlar xodimlarini o‘z xizmat vazifalarini bajarishi doirasida pora olishdan voz kechganligi uchun moddiy rag‘batlantirishni huquqiy jihatdan nomuvofiq deb baholashini bildirgan.
Agentlik qayd etishicha, mazkur masala bo‘yicha jamoatchilik faollari tomonidan bildirilgan e’tirozlar asosli deb topilgan.
Shu munosabat bilan agentlik tomonidan ishlab chiqilgan Vazirlar Mahkamasi qarori loyihasida sohadagi suiiste’molchilik va turli talqinlarning oldini olishga qaratilgan qo‘shimcha cheklovlar nazarda tutilgan.
Xususan, korrupsiyaga oid huquqbuzarliklar haqida xabar bergan shaxslarni rag‘batlantirish tartibini belgilovchi amaldagi nizomning 6-bandiga o‘zgartirish kiritish taklif etilgan. Taklifga muvofiq, rag‘batlantirish choralari huquqni muhofaza qiluvchi organlar xodimlarining o‘z xizmat vazifalarini bajarishi bilan bog‘liq holatlarga nisbatan qo‘llanilmaydi.
“Qonunga bo‘ysunish va pora olmaslik — bu qahramonlik emas, balki har bir davlat xizmatchisining to‘g‘ridan-to‘g‘ri majburiyatidir”, deyiladi agentlik bayonotida.
Agentlikning ta’kidlashicha, korrupsiyaviy holatlarga qarshi kurashish va qonun ustuvorligini ta’minlash mazkur xodimlarning funksional vazifalaridan biri hisoblanadi. Shu bois bunday holatlar uchun alohida moddiy rag‘batlantirish joriy etilishi to‘g‘ri yondashuv sifatida baholanmaydi.
Shuningdek, rag‘batlantirish tizimi ustidan nazorat maxsus elektron platforma orqali markazlashgan tartibda amalga oshirilishi rejalashtirilayotgani, bu esa budjet mablag‘larining asossiz sarflanishining oldini olishga xizmat qilishi qayd etildi.
