O‘zbekiston Kanadaga 2:0 hisobida mag‘lub bo‘ldi

Jahon chempionatiga tayyorgarlik jarayonini davom ettirayotgan O‘zbekiston milliy terma jamoasi Kanada terma jamoasiga qarshi o‘rtoqlik uchrashuvida maydonga tushdi. Edmonton shahridagi “Commonwealth” stadionida bo‘lib o‘tgan bahs mezbonlarning 2:0 hisobidagi g‘alabasi bilan yakunlandi.

 

Uchrashuvning birinchi bo‘limi murosasiz kurashlar ostida o‘tdi. Har ikki jamoa hujumkor o‘yin namoyish etishga harakat qilgan bo‘lsa-da, tanaffusga qadar hisob ochilmadi. Bahsning 24-daqiqasida O‘zbekiston yarim himoyachisi Aziz G‘aniyev jarohat sabab maydonni tark etdi va uning o‘rniga Abbosbek Fayzullayev maydonga tushirildi.

 

Ikkinchi bo‘limda Kanada murabbiylar shtabi tarkibga bir qator o‘zgarishlar kiritdi. Ushbu qaror o‘z samarasini berib, 58-daqiqada Jonatan Osorio hisobni ochdi. O‘zbekiston futbolchilarining hujumdagi xatosidan so‘ng tashkil etilgan tezkor qarshi hujum mezbonlar goliga sabab bo‘ldi.

 

Uchrashuvning asosiy vaqti yakunlanayotgan pallada Kanada ustunligini mustahkamladi. Qo‘shib berilgan daqiqalarda Jeydon Nelson jamoasining ikkinchi golini urib, bahsga yakuniy nuqtani qo‘ydi.

 

Shu tariqa, O‘zbekiston milliy terma jamoasi Jahon chempionati oldidan o‘tkazilgan navbatdagi o‘rtoqlik uchrashuvini mag‘lubiyat bilan yakunladi.