Toshkentda BYD va avtobus ishtirokida ayanchli YTH sodir bo’ldi
Shifoxonaga olib ketilgan haydovchilarning ahvoli noma’lum.
2-iyun kuni Toshkent shahrida “Yutong” rusumli avtobus va “BYD” rusumli yengil avtomobil ishtirokida yo‘l-transport hodisasi sodir bo‘ldi. Bu haqda Toshshahartransxizmat Axborot xizmati xabar berdi.
Dastlabki ma’lumotlarga ko‘ra, soat 15:28 larda “Toshshahartransxizmat” tarkibidagi “2-Avtobus saroyi” filiali tasarrufidagi, 16-sonli yo‘nalishda harakatlanayotgan “Yutong” rusumli avtobus haydovchisi K. D. Mirobod tumani “Nukus” ko‘chasi bo‘ylab harakatlanib, “Nukus” va “T. Shevchenko” ko‘chalari kesishmasida chapga burilish manevrini amalga oshirgan.
Shu vaqtda qarama-qarshi yo‘nalishda kelayotgan “BYD” rusumli avtomobil haydovchisi chorrahada svetoforning taqiqlovchi qizil chirog‘iga bo‘ysunmasdan harakatlanishi oqibatida avtobus bilan to‘qnashuv yuz bergan va yo‘l-transport hodisasi sodir bo‘lgan.
Dastlabki ma’lumotlarga ko‘ra, avtobus haydovchisi hamda “BYD” avtomobili haydovchisi tez tibbiy yordam xodimlari kuzatuvida Respublika 1-sonli klinik shifoxonasiga yuborilgan.
Hodisa Toshkent shahar IIBB Yo‘l harakati xavfsizligi boshqarmasi mas’ul xodimlari tomonidan belgilangan tartibda rasmiylashtirilgan.
