Eron Quvayt xalqaro aeroportiga aviazarba berdi
Aeroport faoliyati vaqtincha to‘xtatilgan.
Quvayt xalqaro aeroportining yo‘lovchi terminaliga Eronning dron va raketalar bilan uyushtirilgan hujum oqibatida bir necha kishi jarohat oldi. Bu haqda mamlakat Mudofaa vazirligi hamda fuqaro aviatsiyasi idoralari ma’lum qildi.
Mudofaa vazirligi vakili polkovnik Saud Abdulaziz al-Attvonning bildirishicha, aeroportning T1 yo‘lovchi terminali bir nechta uchuvchisiz uchish apparatlari tomonidan nishonga olingan. Hujum natijasida moddiy zarar yetgan va jarohatlanganlar qayd etilgan.
Quvaytning KUNA axborot agentligi xabariga ko‘ra, hodisadan so‘ng aeroportda favqulodda vaziyatlarga javob berish rejasi ishga tushirilgan. Havo hujumi aeroport infratuzilmasining ayrim obyektlariga zarar yetkazgan.
Xavfsizlikni ta’minlash maqsadida aeroport faoliyati vaqtincha to‘xtatilgan. Chiquvchi reyslar kechiktirilgan, kiruvchi samolyotlar esa boshqa aeroportlarga yo‘naltirilmoqda.
Quvayt Qurolli Kuchlari vaziyatni nazorat qilayotganini va yuzaga kelishi mumkin bo‘lgan har qanday tahdidlarga javob berishga tayyor ekanini ma’lum qilgan.
