O‘zbekiston terma jamoasining JCHdagi o‘yinlari maktablardagi “Muxlislar maydoni”da namoyish etiladi
Maxsus fan-zonalarda muxlislar terma jamoa uchrashuvlarini katta ekranlar orqali birgalikda kuzatish imkoniga ega bo‘ladi.
O‘zbekiston milliy terma jamoasining Jahon chempionati doirasidagi o‘yinlarini jamoaviy tomosha qilish uchun mamlakat bo‘ylab 208 ta tuman va shahardagi umumta’lim maktablarida “Muxlislar maydoni” tashkil etilmoqda. Bu haqda Maktabgacha va maktab ta’limi vazirligi ma’lum qildi.
Loyihaga ko‘ra, Qoraqalpog‘iston Respublikasi, barcha viloyatlar hamda Toshkent shahrida bittadan yoki bir nechta maktablar tanlab olinib, ularda futbol uchrashuvlarini katta ekranlar orqali tomosha qilish uchun maxsus fan-zonalar tashkil etiladi.
Muxlislar maydonlarining sig‘imi hududlarga qarab 50 nafardan 500 nafargacha etib belgilangan.
Ro‘yxatga ko‘ra, eng katta sig‘im Namangan viloyatidagi Chust tumani 75-maktab hamda Norin tumani 2-maktabida bo‘lib, har birida 500 nafargacha muxlisni qabul qilish imkoniyati yaratiladi.
Ma’lumot o‘rnida, O‘zbekiston terma jamoasining jahon chempionatidagi guruh bosqich o‘yinlari jadvali (Toshkent shahri vaqti bilan) quyidagicha:
- O‘zbekiston — Kolumbiya (18-iyun, soat 7:00);
- O‘zbekiston — Portugaliya (23-iyun, soat 22:00);
- O‘zbekiston — Kongo (28-iyun, soat 4:30).
