Toshkent viloyatida “Tracker” haydochisidan qariyb 9 kg gashish topildi
Narkotik moddalar narkokuryerlar tomonidan qo‘shni davlatdan Toshkent viloyati hududiga kontrabanda yo‘li bilan olib kirilgan.
Davlat xavfsizlik xizmati Chegara qo‘shinlari hamda DXXning Toshkent viloyati bo‘yicha boshqarmasi xodimlari tomonidan o'tkazilgan tezkor tadbir davomida “Toshkent – Farg‘ona” yo‘nalishida harakatlanayotgan “Tracker” rusumli transport vositasi yo‘l-patrul xizmati maskanida to‘xtatilib, belgilangan tartibda ko‘zdan kechirilgan. Bu haqda DXX Zamon.uz'ga xabar berdi.
Aniqlanishicha, avtomobilni Farg‘ona shahrida yashovchi, 1990-yilda tug‘ilgan va muqaddam Jinoyat kodeksining 166-moddasi (talonchilik) bilan sudlangan fuqaro boshqargan. Transport vositasi salonini tekshirish jarayonida haydovchining o‘z iste’moli uchun saqlab yurgan 1,72 gramm narkotik modda borligi ma’lum bo‘lgan.
Qo‘shimcha tekshiruvlar davomida esa avtomashina yukxonasidan jami 8 kilogramm 913 gramm “gashish” giyohvandlik vositasi aniqlanib, ashyoviy dalil sifatida musodara qilingan.
Tergovga qadar o‘tkazilgan surishtiruvlarda mazkur narkotik moddalar avvalroq narkokuryerlar tomonidan qo‘shni davlatdan Toshkent viloyati hududiga kontrabanda yo‘li bilan olib kirilgani hamda gumonlanuvchi tomonidan qabul qilib olinib, yashash manziliga olib ketilayotgan bo‘lgani aniqlangan.
Hozirda mazkur holat yuzasidan jinoyat ishi qo‘zg‘atilgan.
