Isroil va Livan sulhni amalga oshirishga kelishdi — mintaqaviy keskinlik yumshashi mumkin
Mazkur sulh ortidan Eron bilan bog‘liq muzokaralarda ham siljish bo‘lishi kutilmoqda.
Isroil va Livan o‘t ochishni to‘xtatish bo‘yicha kelishuvni amalga oshirishga rozi bo‘ldi. Bu haqda Reuters xabar berdi.
AQSh ma’muriyati bu qadamni Eron bilan bog‘liq kengroq tinchlik bitimi sari muhim siljish sifatida baholamoqda.
AQSh Davlat departamenti bayonotiga ko‘ra, sulhning kuchga kirishi “Hizbulloh”ning jangovar harakatlarni to‘xtatishi va Janubiy Litani hududidan chiqishi bilan bog‘liq.
Shu bilan birga, mintaqada keskinlik saqlanib qolmoqda. Eronning Quvaytga uyushtirgan hujumi aeroport faoliyatiga zarar yetkazib, bir kishi o‘limiga va o‘nlab insonlarning jarohatlanishiga sabab bo‘ldi. Eron esa ayblovlarni rad etmoqda, AQSh esa hujumni tasdiqlamoqda.
CENTCOM janubiy Eronda raketa uchirish maydonlari va Qeshm orolida “mudofaa zarbalari” amalga oshirilganini bildirdi.
Mojaro davomida neft narxlari oshib, Hormuz bo‘g‘ozi orqali tashuvlar hanuz to‘liq tiklanmagan. Eron va AQSh muzokaralarni davom ettirmoqda, biroq yakuniy kelishuvga erishilmagan. AQSh prezidenti Donald Tramp Eron yadro quroliga ega bo‘lmasligi asosiy shart ekanini ta’kidladi.
Shu bilan birga, Isroil Livanda zarbalarni davom ettirmoqda, tomonlar o‘rtasida vaqti-vaqti bilan to‘qnashuvlar kuzatilmoqda.
