O‘zbekistonning JCHdagi o‘yinlari 220 ta maktabda namoyish etiladi
Mamlakat bo‘ylab umumta’lim maktablarida “Muxlislar maydoni” loyihasi tashkil etiladi.
Joriy yilning iyun–iyul oylarida bo‘lib o‘tadigan futbol bo‘yicha Jahon chempionati davomida O‘zbekiston milliy terma jamoasini qo‘llab-quvvatlash maqsadida mamlakat bo‘ylab umumta’lim maktablarida “Muxlislar maydoni” loyihasi tashkil etiladi. Bu haqda Maktabgacha va maktab ta’limi vazirligi xabar berdi.
Loyiha doirasida 220 ta maktabda futbol tomoshalari uchun zarur sharoitlar yaratiladi hamda O‘zbekiston terma jamoasining Jahon chempionatidagi o‘yinlari katta ekranlarda jonli efirda namoyish etiladi.
Mazkur maskanlarda o‘quvchilar, ota-onalar va barcha futbol ixlosmandlari terma jamoa uchrashuvlarini birgalikda tomosha qilish imkoniyatiga ega bo‘ladi.
Ma’lumot uchun, O‘zbekiston terma jamoasining guruh bosqichidagi o‘yinlari Toshkent vaqti bilan quyidagi jadval asosida o‘tkaziladi:
O‘zbekiston — Kolumbiya (18-iyun, soat 07:00);
O‘zbekiston — Portugaliya (23-iyun, soat 22:00);
O‘zbekiston — Kongo (28-iyun, soat 04:30)
