Ronalduning transfer qiymati keskin pasayib ketdi
“Al-Nasr”dagi muvaffaqiyatli mavsumga qaramay, futbolchining bozor qiymati pasaydi.
Saudiya Arabistonining “Al-Nasr” klubi va Portugaliya terma jamoasi sardori Krishtianu Ronalduning transfer qiymati Transfermarkt portalining so‘nggi yangilanishiga ko‘ra pasaytirildi.
Ma’lumotlarga ko‘ra, 41 yoshli futbolchining bozor qiymati 12 million yevrodan 10 million yevrogacha kamaygan. Bu ko‘rsatkich uning professional faoliyatidagi eng past darajalardan biri sifatida qayd etilmoqda.
Ronaldu 2025/26-yilgi mavsumda “Al-Nasr” safida Saudiya Arabistoni chempionligini qo‘lga kiritgan. Mavsum davomida u 28 ta gol urib, jamoasining eng yaxshi to‘purari bo‘lgan. Umuman olganda, u o‘tgan mavsumda 37 o‘yinda maydonga tushib, 30 ta gol va 5 ta golli uzatma muallifi bo‘lgan.
Futbolchi “Al-Nasr”ga 2023-yil yanvar oyida qo‘shilgan bo‘lib, bu uning faoliyatidagi ilk Saudiya Arabistoni chempionligi hisoblanadi.
