O'zbekistonda 5 oyda 59 ta narkojinoiy guruh faoliyatiga chek qo‘yildi

 

Joriy yilning yanvar–may oylarida huquq-tartibot organlarining tezkor bo‘linmalari hamkorligida uyushgan narkojinoyatchilik hamda jinoiy guruhlar faoliyatiga qarshi keng ko‘lamli kompleks tezkor tadbirlar amalga oshirilgan.

 

Natijada narkotik vositalarni tarqatish bilan shug‘ullangan 59 ta yirik uyushgan narkojinoiy guruh faoliyatiga chek qo‘yilgan. Mazkur guruhlarning 15 nafar yetakchisi va 199 nafar a’zosi qo‘lga olingan. Shuningdek, 15 ta yashirin narkolaboratoriya fosh etilgan.

 

Tezkor tadbirlar davomida 1,2 tonna an’anaviy narkotik moddalar, 54 kilogramm sintetik narkotik vositalar, 4,6 million dona psixotrop dori vositalari hamda 3 tonnadan ortiq noqonuniy prekursorlar musodara qilingan. Mutaxassislar qayd etishicha, ushbu jinoiy tarmoqlar faoliyatining to‘xtatilishi natijasida katta miqdordagi narkotik moddalarning noqonuniy aylanishi oldi olingan.

 

Shuningdek, narkojinoyatchilikka qarshi kurashish yo‘nalishida Qozog‘iston, Tojikiston va Qirg‘iziston Respublikalarining vakolatli organlari bilan hamkorlikda 7 marotaba xalqaro tezkor tadbirlar o‘tkazilgan. Tahlillarga ko‘ra, noqonuniy narkotik aylanmasining qisqarishi “qora bozor”dagi narxlarning sezilarli oshishiga ham sabab bo‘lgan.

 

Uyushgan guruhiy jinoyatchilikka qarshi kurash doirasida esa 40 ta yirik jinoiy guruh faoliyatiga barham berilgan. Ularning 48 nafar yetakchisi, jumladan, 6 nafari xorijiy davlatlarda ushlanib O‘zbekistonga olib kelingan. Shuningdek, 224 nafar guruh a’zosi qo‘lga olingan.

 

Mazkur jinoiy guruhlar mamlakatning 50 ta shahar va tumanida talonchilik, bezorilik, tovlamachilik, tadbirkorlik faoliyatiga to‘sqinlik qilish hamda fuqarolarga tan jarohati yetkazish kabi og‘ir va o‘ta og‘ir jinoyatlarni sodir etib kelgani ma’lum qilingan.