O‘zbekistonga 5 oyda 5,3 milliondan ortiq xorijiy sayyoh keldi
Bu o‘tgan yilning mos davriga nisbatan 27,3 foizga ko‘p bo‘lib, turizm xizmatlari eksporti 2,2 milliard dollardan oshdi.
O‘zbekistonda turizm sohasini rivojlantirish va uning iqtisodiyotdagi ulushini oshirishga qaratilgan islohotlar natijasida xorijiy sayyohlar oqimi sezilarli darajada oshdi, deya xabar bermoqda Turizm qo‘mitasi.
Ma’lumotlarga ko‘ra, 2026-yilning dastlabki besh oyida mamlakatga 5 million 352 ming nafardan ortiq xorijiy turist tashrif buyurgan. Bu ko‘rsatkich o‘tgan yilning mos davriga nisbatan 1 million 148 ming nafarga yoki 27,3 foizga ko‘pdir.
Joriy yilning may oyida esa O‘zbekistonga turizm maqsadida 1,3 milliondan ortiq sayyoh kelgan.
Qayd etilishicha, ushbu o‘sish viza tartib-taomillarining soddalashtirilishi, vizasiz rejim joriy etilgan davlatlar sonining ortishi hamda elektron viza tizimi imkoniyatlarining kengaytirilishi bilan bog‘liq.
Shuningdek, mamlakatning madaniy-tarixiy merosi, ziyorat, ekologik, gastronomik, tibbiy va tog‘ turizmi yo‘nalishlari xalqaro maydonda faol targ‘ib qilinmoqda.
Hisobot davrida O‘zbekiston tomonidan 2 milliard 244 million AQSh dollari miqdorida turizm xizmatlari eksporti amalga oshirilgan. Bu ko‘rsatkich turizm sohasining iqtisodiyotga valyuta tushumlarini jalb etish, xizmatlar sektorini rivojlantirish va aholi bandligini ta’minlashdagi o‘rni ortib borayotganini ko‘rsatadi.
Xabarga ko‘ra, sayyohlar oqimining o‘sishi O‘zbekistonning Markaziy Osiyodagi eng jadal rivojlanayotgan turistik yo‘nalishlardan biriga aylanib borayotganini tasdiqlamoqda.
