Surxondaryoda 45 mln so‘m qarz berib, 128 mln talab qilganlar ushlandi
Qarzni undirish maqsadi bir erkak yoʻllagan bo'lib, u aytilgan summani tayyorlab bermasa, qarz oluvchilarning hayotiga nuqta qoʻyishi bilan tahdid qilgan.
Surxondaryoda tovlamachilik bilan shug'ullangan shaxslar qo'lga olindi.Bu haqda Ichki ishlar vazirligi xabar berdi.
Ma’lum qilinishicha, 1986-yilda tug‘ilgan ikki nafar ayol Denov tumani Ichki ishlar boshqarmasiga murojaat qilib, gumonlanuvchi ayol ulardan mavjud qarz miqdoridan bir necha baravar ko‘p mablag‘ talab qilayotganini bildirgan.
Jumladan, bir holatda 45 million so‘m qarz evaziga 128 million so‘m, ikkinchi holatda esa 50 million so‘m qarzga nisbatan 140 million so‘m pul talab qilingani qayd etilgan. Shuningdek, qarzni undirish maqsadida vositachi sifatida jalb etilgan erkak jabrlanuvchilarga nisbatan zo‘ravonlik va hayotiga tahdid qilish holatlarini sodir etgan.
Mazkur murojaatlar asosida 15-may kuni Denov tumanida tezkor tadbir o‘tkazilib, gumonlanuvchilar pul mablag‘larini olayotgan vaqtda ashyoviy dalillar bilan qo‘lga olingan.
Hozirda holat yuzasidan Denov tumani IIB huzuridagi tergov bo‘limi tomonidan Jinoyat kodeksining 165-moddasi 1-qismi (tovlamachilik) bilan jinoyat ishi qo‘zg‘atilgan va dastlabki tergov harakatlari olib borilmoqda.
