Zelenskiy Putinga ochiq xat yo‘llab, uchrashuv taklif qildi
Ukraina prezidenti uchrashuv uchun neytral maydon sifatida Shveytsariya, Turkiya yoki arab davlatlaridan birini taklif qilgan.
Ukraina prezidenti Vladimir Zelenskiy Rossiya prezidenti Vladimir Putinga ochiq xat yo‘llab, mojaroni tinch yo‘l bilan hal etish maqsadida shaxsiy uchrashuv o‘tkazishni taklif qilgan.
Ukraina Tashqi ishlar vaziri Andrey Sibiganing ma’lum qilishicha, mazkur xat diplomatik kanallar orqali Rossiya tomoniga yuborilmoqda.
Murojaatda Zelenskiy Ukraina tomoni to‘liq sulh tuzish hamda “hamma-hammaga” tamoyili asosida harbiy asirlarni almashishga tayyor ekanini bildirgan. Shuningdek, u muzokaralar jarayonida AQSH va Yevropa davlatlari vakillari ham ishtirok etishi lozimligini qayd etgan.
Ukraina prezidenti ehtimoliy uchrashuv uchun neytral maydon sifatida Shveytsariya, Turkiya yoki arab davlatlaridan birini taklif qilgan. Unga ko‘ra, aynan hozirgi vaziyat diplomatik muloqotni boshlash uchun imkoniyat yaratmoqda.
Kreml matbuot kotibi Dmitry Peskov Rossiya tomoni xat bilan tanishganini, biroq prezident Putin hali uning mazmunini ko‘rib chiqishga ulgurmaganini ma’lum qilgan. Uning so‘zlariga ko‘ra, tegishli ma’lumot keyinchalik davlat rahbariga yetkaziladi.
