Endilikda yiliga bir nechta avtomobil import qilish mumkin
Avtomobillarni import qilishda muvofiqlik sertifikatini yiliga bir marta berish normasi amaldan chiqarildi.
O‘zbekistonda jismoniy va yuridik shaxslar tomonidan shaxsiy foydalanish uchun avtomobil olib kirishda amal qilib kelgan cheklovlardan biri bekor qilindi.
Prezident farmoniga muvofiq, endilikda transport vositalarini import qilishda bir kalendar yil davomida faqat bitta avtomobil uchun muvofiqlik sertifikati berilishini nazarda tutuvchi norma amaldan chiqarildi.
Mazkur o‘zgartirish Vazirlar Mahkamasining 2017-yil 25-apreldagi 237-son qarori bilan tasdiqlangan “Muomalaga chiqarilayotgan g‘ildirakli transport vositalarining xavfsizligi to‘g‘risidagi umumiy texnik reglament”ga kiritildi.
Shu tariqa, transport vositalari texnik reglament talablariga mos bo‘lgan taqdirda, ularni import qilish va muvofiqlik sertifikatini rasmiylashtirishda avvalgi yillik cheklov qo‘llanilmaydi.
Farmon bilan qurilish sohasida ham qator yengilliklar joriy etildi. Xususan, 2029-yil 1-iyulga qadar O‘zbekistonda ishlab chiqarilmaydigan qurilishda foydalaniladigan maxsus texnikalar, laboratoriya hamda instrumental nazorat uskunalarini import qilish bojxona bojidan ozod etildi.
