Eron AQSh bilan kelishuv uchun 24 milliard dollarlik aktivlarni muzlatishdan chiqarishni talab qildi
Eron rasmiysining ta'kidlashicha, Tehron va Vashington o‘rtasidagi muzokaralar boshi berk ko‘chaga kirib qolgan.
Eron va AQSh o‘rtasida muhokama qilinayotgan ehtimoliy kelishuv Tehronning xorijdagi 24 milliard dollarlik aktivlarini muzlatishdan chiqarish masalasiga bog‘liq bo‘lib qolmoqda. Bu haqda Eron Oliy rahbarining harbiy maslahatchisi Mohsen Rizoiy CNN telekanaliga bergan intervyusida ma’lum qildi.
Uning ta’kidlashicha, hozirgi vaqtda ikki davlat o‘rtasidagi muzokaralar boshi berk ko‘chaga kirib qolgan va vaziyatni o‘zgartirish AQSh prezidenti Donald Tramp qo‘lida.
“Eron aktivlarini muzlatishdan chiqarish ikki tomon o‘rtasidagi ishonchni mustahkamlash yo‘lidagi muhim qadam bo‘lishi mumkin. Bu mablag‘lar Eronga tegishli bo‘lib, ular AQShniki emas”, — deya ta'kidlagan Rizoiy.
Ma’lum qilinishicha, Tehron vaqtinchalik kelishuv imzolangach darhol 12 milliard dollar, keyingi bosqichda esa yana 12 milliard dollar mablag‘ni ozod qilishni talab qilmoqda.
CNN ma’lumotlariga ko‘ra, AQSh rasmiylari ushbu aktivlarga qo‘yilgan cheklovlarni bekor qilish Vashingtonning Tehronga nisbatan eng muhim bosim vositalaridan birini yo‘qotishiga olib kelishidan xavotir bildirmoqda.
Shu sababli, muzlatilgan aktivlar masalasi Eron va AQSh o‘rtasidagi muzokaralarning eng muhim va bahsli mavzularidan biri bo‘lib qolmoqda. Tomonlar o‘rtasidagi kelishuv istiqbollari aynan ushbu masalaning qanday hal etilishiga bog‘liq ekani qayd etilmoqda.
