Hindistondagi mehmonxona yong‘inida O‘zbekiston fuqarosi halok bo'ldi
Hindiston Tashqi ishlar vazirligi ma’lumotiga ko‘ra, Dehlidagi yong‘inda 13 nafar xorijlik halok bo‘lgan, 20 dan ortiq chet el fuqarosi jarohat olgan.
Hindiston poytaxti Nyu-Dehli shahrining janubiy qismida joylashgan mehmonxonada yuz bergan yirik yong‘in oqibatida 21 kishi halok bo‘lgan. Qurbonlar orasida bir nafar O‘zbekiston fuqarosi ham bor. Bu haqda TASS Hindistonda elchixonasiga tayanib xabar berdi.
Hindiston Tashqi ishlar vazirligi vakilining ma’lum qilishicha, hodisa oqibatida 13 nafar xorijiy fuqaro vafot etgan. Ular orasida Mozambik, Nigeriya, Qirg‘iziston, O‘zbekiston, Bangladesh, Liberiya, Kongo va Iroq fuqarolari bor.
Rasmiy ma’lumotlarga ko‘ra, yong‘in oqibatida 20 nafardan ortiq xorijiy fuqaro turli darajadagi tan jarohatlari olgan. Hindiston Tashqi ishlar vazirligi jabrlanganlar va halok bo‘lganlarning davlatlari elchixonalari bilan hamkorlikda zarur yordam ko‘rsatish ishlarini olib bormoqda.
Vazirlik vakili mahalliy hokimiyat organlari hamda tibbiyot muassasalari bilan birgalikda hujjatlarni rasmiylashtirish va jabrlanganlarga yordam ko‘rsatish bo‘yicha ishlar davom etayotganini bildirgan.
Hodisa 3-iyun kuni ertalab sodir bo‘lgan. Qutqaruv xizmatlari tomonidan 47 kishi xavfsiz hududga olib chiqilgan. Yong‘in sabablari yuzasidan tergov harakatlari olib borilmoqda.
Dastlabki ma’lumotlarga ko‘ra, mehmonxona egasi huquq-tartibot organlari tomonidan qo‘lga olingan. Hozirda voqeaning barcha tafsilotlari o‘rganilmoqda.
Avvalroq Hindistondagi O'zbekiston elchixonasi ushbu yirik yong'inda qurbonlar yoki jarohatlanganlar orasida O'zbekiston fuqarolari yo'qligini ma'lum qilgan edi. Biroq, keyinchalik Hindiston tomonidan yangilangan ma'lumotlar taqdim etildi.
