Livan prezidenti Eronni mamlakatdan “savdolashuv vositasi” sifatida foydalanayotganlikda aybladi
U Livan xalqining urushlardan charchaganini ta’kidlab, mintaqada barqarorlikka erishish uchun diplomatik yechimlarni afzal ko‘rishini bildirdi.
Livan prezidenti Jozef Aun juma kuni Eronni keskin tanqid qilib, uni AQSH va Isroil bilan bog‘liq mojaroda Livan xalqining xohishiga qarshi ravishda mamlakatdan savdolashuv vositasi sifatida foydalanayotganlikda aybladi. Bu haqda u CNN telekanali jurnalistiga bergan intervyusida ma’lum qildi.
Prezidentning ta’kidlashicha, Livan xalqi yillar davomida davom etib kelayotgan qurolli mojarolardan charchagan va mamlakat tinchlik hamda barqarorlikka muhtoj. Uning so‘zlariga ko‘ra, fuqarolar har bir necha yilda urushlar oqibatida uy-joylari vayron bo‘lishini emas, balki xavfsiz va munosib hayotni istaydi.
Aun Livandagi Eron tomonidan qo‘llab-quvvatlanadigan Hizbulloh harakati hamda Isroil o‘rtasidagi qarama-qarshiliklar mamlakatni og‘ir oqibatlarga olib kelganini qayd etdi. U Eronning Livan hududi va siyosiy vaziyatidan AQSH bilan muzokaralarda bosim vositasi sifatida foydalanayotganini iddao qildi.
“Bu sizning mamlakatingiz emas, bu bizning mamlakatimiz. Eron AQSH bilan muzokaralarda Livandan savdolashuv vositasi sifatida foydalanmoqda”, — dedi Livan prezidenti.
Aunning fikricha, Livan manfaatlari Eronning mintaqaviy strategik maqsadlari bilan har doim ham mos kelmaydi va mamlakat o‘z suverenitetini himoya qilishi kerak.
Prezident bayonotlariga javoban Eron tashqi ishlar vaziri Abbos Aroqchi Livan Eron uchun savdolashuv vositasi bo‘lganida, Tehron allaqachon tegishli kelishuvlarga erishgan bo‘lishini ta’kidladi.
Shuningdek, u Livan rahbariyatini mamlakatni “haqiqiy dushmanidan” himoya qilishga chaqirdi.
Intervyuda Aun Livan hukumati Isroil bilan urushni yakunlash va uzoq muddatli xavfsizlikni ta’minlash maqsadida muzokaralarga tayyor ekanini ham bildirdi. Uning aytishicha, Bayrut AQSH ko‘magida Isroil bilan to‘g‘ridan-to‘g‘ri sulh bo‘yicha muzokaralar olib borishga tayyor.
“Biz tayyormiz, biz istaymiz va urushni tugatishga qaratilgan muzokaralarga sodiqmiz”, — dedi Livan prezidenti.
Aun 1948-yildan buyon davom etayotgan mojarolar Livan va Isroil xalqlarini urushlardan toliqtirganini ta’kidlab, tomonlar oldida “urush yoki diplomatiya” tanlovi turganini qayd etdi.
Shu bilan birga, Hizbulloh rahbari Naim Qassem Livan–Isroil muzokaralarini tanqid qilib, bunday yondashuvni “taslim bo‘lish” deb baholadi. Harakat Isroil qo‘shinlari Livan hududidan chiqib ketmaguncha qurolsizlanishga rozi emasligini bildirgan.
Aun esa Hizbulloh masalasi faqat Livan davlati tomonidan hal etilishi mumkinligini, biroq bu jarayon Isroil qo‘shinlari mamlakat hududidan chiqib ketganidan keyin samarali kechishini ta’kidladi. Uning fikricha, harbiy bosim orqali harakatni butunlay yo‘q qilishning imkoni yo‘q.
Prezident, shuningdek, urushlardan ko‘ra diplomatik yechimlarni afzal ko‘rishini bildirib, Livan xalqining kelajagi uchun muzokaralar eng maqbul yo‘l ekanini qayd etdi.
Ayni paytda Livan hukumati Hizbullohni qurolsizlantirish majburiyatini olgan bo‘lsa-da, kuzatuvchilar bunday qadam mamlakatda ichki keskinlikni kuchaytirishi va yangi qurolli qarama-qarshiliklarga sabab bo‘lishi mumkinligini ta’kidlamoqda. Livan rahbariyati esa siyosiy muloqot orqali muammoni hal etishga urinishini ma’lum qilgan.
