Samarqandda homilasi nobud bo‘lgan ayol uch kun o‘tib vafot etdi

 

Ijtimoiy tarmoqlarda Samarqand viloyatining Ishtixon tumanida homilasi nobud bo‘lgan ayolning oradan uch kun o‘tib vafot etgani haqida xabarlar tarqaldi. Mazkur holat yuzasidan Sog‘liqni saqlash vazirligi rasmiy ma’lumot berdi.

 

Qayd etilishicha, fuqaro N.E. joriy yil 10-aprel kuni Ishtixon tuman markaziy shifoxonasining tug‘uruq bo‘limiga qorin va bel sohasidagi og‘riqlar bilan murojaat qilgan. Tibbiy ko‘rik davomida qog‘onoq suvlari xiralashgani hamda homilaning yurak urishida jiddiy o‘zgarishlar aniqlangan.

 

Shifokorlar tomonidan bemor va uning yaqinlariga shoshilinch ravishda kesarcha kesish amaliyotini o‘tkazish zarurligi tushuntirilgan. Biroq bemorning yaqinlari jarrohlik amaliyotiga rozilik bermagan va ayol boshqa tibbiyot muassasasiga olib ketilgan.

 

Keyingi tekshiruvlarda homilaning antenatal o‘limi aniqlangan. Shundan so‘ng bemor 11-aprel kuni Ishtixon tuman markaziy shifoxonasiga qayta murojaat qilgan va statsionar davolanishga yotqizilgan.

 

Shifokorlar tomonidan zarur tibbiy muolajalar o‘tkazilganiga qaramay, fuqaro N.E. 14-aprel kuni vafot etgan.

 

Mazkur holat yuzasidan huquqni muhofaza qiluvchi organlar hamda viloyat sog‘liqni saqlash boshqarmasi mutaxassislari ishtirokida xizmat tekshiruvi va sud-tibbiy ekspertiza tayinlangan.

 

Sud-tibbiy ekspertiza xulosasiga ko‘ra, marhumaning o‘limiga o‘tkir yurak-qon tomir va nafas yetishmovchiligi bilan kechgan o‘pka arteriyasi tromboemboliyasi sabab bo‘lgan.

 

Shuningdek, mas’ul tibbiyot xodimlarining harakatlariga huquqiy baho berish maqsadida qo‘shimcha komission sud-tibbiy ekspertiza tayinlangan. Hozirda tuman prokuraturasi tomonidan tergovga qadar tekshiruv harakatlari davom ettirilmoqda.

 

Eslatib o'tamiz, avvalroq  Namanganda ayol ukol olayotganda vafot etgani haqida xabar berilgan edi.