Toshkentda IIB binosida PPX xodimiga pora taklif qilgan shaxs qo‘lga olindi
Uning mashinasidan o‘tkir hidli modda solingan paketlar topilgan.
Chilonzor tumanida huquq-tartibot organlari xodimlariga pora berishga urinish bilan bog‘liq holat fosh etildi. Bu haqda Toshkent shahar IIBB xabar berdi.
Joriy yil 27-mart kuni tungi soat 00:30 larda PPX inspektorlari tomonidan “Seoul Mun” sayilgohi avtoturargohida shubhali harakatlari bilan e’tiborni tortgan J.Q va Z.J. lar to‘xtatilib, tekshiruv o‘tkazilgan.
Tekshiruv davomida 1998-yilda tug‘ilgan Z.J boshqaruvida bo‘lgan MG5 Scorpio avtomashinasi ko‘zdan kechirilganda, ichidan o‘tkir hidli modda solingan paketlar aniqlanib, protsessual tartibda rasmiylashtirib olingan.
Shundan so‘ng fuqaro Z.J aniqlangan holat yuzasidan huquqiy chora ko‘rilmasligi evaziga safdor Qamariddin Bekmurodovga 7 000 AQSh dollari miqdorida pora taklif qilgan. Biroq xodim ushbu noqonuniy taklifni rad etib, holat yuzasidan ichki ishlar organlarining tegishli bo‘linmasiga murojaat qilgan.
Keyinchalik, Chilonzor tuman IIB binosida o‘tkazilgan tezkor tadbir davomida fuqaro Z.Jarulloh pora sifatida 7 000 AQSh dollarini berayotgan vaqtda ashyoviy dalillar bilan qo‘lga olingan.
Mazkur holat yuzasidan Chilonzor tuman prokuraturasi tomonidan O‘zbekiston Respublikasi Jinoyat kodeksining 211-moddasi (“Pora berish”) bilan jinoyat ishi qo‘zg‘atilib, tergov harakatlari olib borilmoqda.
