Ishsizlik nafaqasi uchun ajratilgan mablag‘larning 75 foizi ishlatilmagan — Bandlik vazirligi faoliyati tanqid ostiga olindi
40 ming nafar xotin-qizga subsidiya ajratish rejalashtirilgan bo‘lsa-da, amalda ushbu imkoniyatdan atigi 7 ming nafari foydalangan.
Oliy Majlis Qonunchilik palatasining navbatdagi majlisida kambag‘allikni qisqartirish va aholini ijtimoiy qo‘llab-quvvatlash dasturlariga ajratilgan mablag‘lardan foydalanish samaradorligi tanqid ostiga olindi.
Majlisda ta’kidlanishicha, 2025-yilda mamlakatda kambag‘allikni qisqartirishga qaratilgan dasturlarni moliyalashtirish uchun davlat budjetidan 45,5 trillion so‘m mablag‘ yo‘naltirilgan. Bu umumiy davlat xarajatlarining 11,9 foizini tashkil etadi.
Muhokamalar davomida deputat Sayyora Imomova ayrim yo‘nalishlarda mablag‘lardan foydalanish samaradorligi past bo‘lganini qayd etgan. Uning ma’lum qilishicha, Kambag‘allikni qisqartirish davlat maqsadli jamg‘armasiga ajratilgan 485,6 milliard so‘m mablag‘ning atigi 63,9 foizi ishlatilgan.
Shuningdek, Bandlikka ko‘maklashish davlat maqsadli jamg‘armasi orqali ishsizlik nafaqasi va moddiy yordam ko‘rsatish uchun ajratilgan mablag‘larning 75 foizi, ya’ni 48,6 milliard so‘mi ishlatilmay qolgan.
Deputat xotin-qizlarni qo‘llab-quvvatlash uchun ajratilgan subsidiyalar taqsimoti bilan bog‘liq holatlarga ham e’tibor qaratgan. Qayd etilishicha, hokim yordamchilari tavsiyasi asosida 40 ming nafar xotin-qizga subsidiya ajratish rejalashtirilgan bo‘lsa-da, amalda ushbu imkoniyatdan atigi 7 ming nafari foydalangan.
Natijada 33 ming nafar ayolni tadbirkorlik faoliyatiga jalb etish, ularning bandligini ta’minlash va iqtisodiy faolligini oshirish bo‘yicha belgilangan ko‘rsatkichlarga erishilmagan. Bundan tashqari, mazkur yo‘nalish uchun ajratilgan mablag‘larning ham atigi 27 foizi o‘zlashtirilgani ta’kidlangan.
Deputatning fikricha, davlat tomonidan katta hajmdagi mablag‘lar ajratilganiga qaramay, ehtiyojmand oilalar va xotin-qizlarni qo‘llab-quvvatlash bo‘yicha mavjud imkoniyatlardan to‘liq foydalanilmagan.
Bandlik vaziri o‘rinbosari Alisher Murodov mazkur holatni mablag‘ ajratish mexanizmlaridagi o‘zgarishlar bilan izohlagan. Uning aytishicha, samaradorligi past deb topilgan 14 turdagi subsidiya bekor qilinib, ularning o‘rniga foizsiz ssudalar va boshqa moliyaviy qo‘llab-quvvatlash vositalari joriy etilgan.
Vazirlik vakiliga ko‘ra, ushbu o‘zgarishlar natijasida subsidiya olgan ayollar soni rejalashtirilgan ko‘rsatkichga yetmagan bo‘lsa-da, mablag‘lardan foydalanishning yangi va samaraliroq mexanizmlari shakllantirilgan.
Biroq Qonunchilik palatasi spikeri Nuriddin Ismoilov vazirlikning izohlarini qoniqarli deb hisoblamagan. U ko‘tarilgan masalalar bo‘yicha aniq tahlil va asoslantirilgan javoblar berilmaganini ta’kidlagan.
Spiker subsidiya ajratilishi rejalashtirilgan 40 ming nafar ayoldan atigi 7 ming nafari ushbu imkoniyatdan foydalanganini tanqid qilib, bunday holatlarning sabablarini chuqur o‘rganish zarurligini qayd etgan. Shuningdek, mas’ul tashkilotlarga mavjud kamchiliklarni tahlil qilish hamda kelgusida bu kabi holatlar takrorlanishining oldini olish bo‘yicha aniq choralar ishlab chiqish lozimligini ta’kidlagan.
