Isroildagi o‘zbekistonliklar ogohlantirildi
O‘zbekistonning Isroildagi elchixonasi fuqarolarga tezkor ehtiyot choralarini ko‘rishni tavsiya qildi.
Isroildagi xavfsizlik vaziyati keskinlashishi mumkinligi munosabati bilan O‘zbekistonning ushbu mamlakatdagi elchixonasi vatandoshlarga ehtiyotkorlikni kuchaytirish bo‘yicha murojaat bilan chiqdi.
Diplomatik vakolatxona Isroilda istiqomat qilayotgan yoki vaqtincha bo‘lib turgan barcha O‘zbekiston fuqarolarini mamlakat Front orti qo‘mondonligi tomonidan berilayotgan ko‘rsatmalarga qat’iy rioya etishga chaqirgan.
Elchixona tavsiyalariga ko‘ra, fuqarolar doimo himoyalangan joylarga yaqin hududlarda bo‘lishlari, havo hujumi haqida signal yoki sirena yangragan taqdirda zudlik bilan boshpanaga kirishlari lozim. Shuningdek, rasmiy ruxsat berilmaguncha himoyalangan joylarni tark etmaslik hamda favqulodda vaziyatlarga oid rasmiy axborotlarni muntazam kuzatib borish tavsiya etilgan.
Ma’lum qilinishicha, zarurat tug‘ilganda O‘zbekiston fuqarolari elchixonaning navbatchilik va tezkor aloqa raqamlari orqali murojaat qilishlari mumkin.
