Qarshidagi “zapravka” portlashida 6 kishi halok bo‘ldi
Hodisa natijasida yana 5 nafar fuqaro turli tan jarohatlari bilan shifoxonaga yotqizilgan
Qashqadaryo viloyatining Qarshi tumanida joylashgan maishiy gaz ballonlariga suyultirilgan gaz quyish shoxobchasida yuz bergan portlash oqibatida 6 nafar fuqaro halok bo‘ldi, yana 5 nafar fuqaro turli darajadagi tan jarohatlari bilan shifoxonaga yotqizilgan.
Favqulodda vaziyatlar vazirligi ma’lumotiga ko‘ra, hodisa 8-iyun kuni soat 13:50 da Qarshi tumanining “Chaman” mahalla fuqarolar yig‘ini hududida joylashgan MChJ shaklidagi gaz quyish shoxobchasida sodir bo‘lgan.
Xabar kelib tushgach, voqea joyiga 5 ta qutqaruv bo‘linmasi jalb etilgan. Qutqaruvchilar soat 14:02 da hodisa joyiga yetib borgan. Yong‘in soat 14:05 da qurshab olinib, soat 14:55 da to‘liq bartaraf etilgan.
Dastlabki ma’lumotlarga ko‘ra, portlash va yong‘in oqibatida 4 ta avtomobil, jumladan 2 ta Cobalt hamda gaz tashishga mo‘ljallangan 2 ta maxsus transport vositasi zarar ko‘rgan. Shuningdek, 2 ta yer osti yoqilg‘i saqlash rezervuari ham yongan.
Hodisa oqibatlarini bartaraf etish, jabrlanganlarga zarur yordam ko‘rsatish hamda portlash sabablarini aniqlash maqsadida O‘zbekiston Prezidenti topshirig‘iga asosan Bosh vazir o‘rinbosari Ochilboy Ramatov boshchiligida Hukumat komissiyasi tuzilgan.
Komissiyaga jabrlanganlarga amaliy yordam ko‘rsatish, portlashning kelib chiqish sabablarini o‘rganish, zarar ko‘lamini aniqlash hamda kelgusida bunday hodisalarning oldini olish bo‘yicha takliflar ishlab chiqish vazifalari yuklatilgan.
Ayni paytda hodisa sodir bo‘lgan hudud to‘liq nazoratga olingan bo‘lib, oqibatlarni bartaraf etish ishlari davom ettirilmoqda.
