Toshkentda uyida givohvandlik o'simliklarini yetishtirgan shaxs ushlandi

 

Davlat xavfsizlik xizmati hamda ichki ishlar organlari xodimlari hamkorligida o‘tkazilgan tezkor-qidiruv tadbirlari davomida Toshkent shahri va Xorazm viloyatida giyohvandlik vositalarining noqonuniy muomalasiga aloqador shaxslar qo‘lga olindi. Bu haqda DXX Zamon.uz'ga malum qildi.

 

Ma’lum qilinishicha, Toshkent shahrida yashovchi, 1996-yilda tug‘ilgan va muqaddam sudlangan fuqaro internet orqali giyohvandlik vositalarini sotish bilan shug‘ullanib kelgan. Uning Mirzo Ulug‘bek tumanidagi vaqtinchalik yashash xonadoni ko‘zdan kechirilganda giyohvandlik vositasi, 300 dona zip-paket, izolentalar hamda elektron tarozi aniqlanib, ashyoviy dalil sifatida rasmiylashtirib olingan.

 

Dastlabki surishtiruv jarayonida ushbu shaxs Toshkent tumanida joylashgan, onasiga tegishli xonadonda gidroponika usulida giyohvandlik o‘simliklarini yetishtirib kelayotgani ma’lum bo‘lgan. Mazkur manzil ko‘zdan kechirilganda 10 tup kannabis o‘simligi, bir tup quritilgan giyohvandlik vositasi, shuningdek, ularni parvarishlashda foydalanilgan maxsus vositalar va elektron tarozi musodara qilingan.

 

Yana bir holatda, “Samarqand–Xorazm” yo‘nalishida harakatlanayotgan Cobalt avtomashinasi Tuproqqal’a tumani hududida to‘xtatilib tekshirilgan. Natijada avtomashinada yo‘lovchi sifatida ketayotgan Urgut tumanida yashovchi 2003-yilda tug‘ilgan shaxsga tegishli 810 gramm opiy moddasi borligi aniqlangan.

 

Tergovga qadar tekshiruvlarda ushbu giyohvandlik vositasi qo‘shni davlatdan kontrabanda yo‘li bilan olib kirilgani va Xorazm viloyatida sotish maqsadida tashib ketilayotgani ma’lum bo‘lgan.

 

Hozirda mazkur holatlar yuzasidan jinoyat ishlari qo‘zg‘atilib, tergov harakatlari olib borilmoqda. Shuningdek, gumonlanuvchilarning ehtimoliy jinoiy sheriklarini aniqlash bo‘yicha tezkor tadbirlar davom ettirilmoqda.