AQSH Jahon chempionati hakamini mamlakatga kiritmadi
U Jahon chempionati uchrashuvini boshqaradigan ilk somalilik hakam bo‘lishi kutilayotgandi.
AQSh hukumati somalilik futbol hakami Umar Abdulqodir Artanning mamlakatga kirishiga ruxsat bermadi. Shu sababli u 2026-yilgi FIFA Jahon chempionati doirasidagi faoliyatini boshlay olmaydi. Bu haqda Reuters xabar berdi.
FIFA ma’lumotiga ko‘ra, Artan dam olish kunlari AQSh hududiga kiritilmagani sababli turnir oldidan mashg‘ulotlarda qatnasha olmaydi va musobaqa o‘yinlarini boshqara olmaydi. U Jahon chempionati uchrashuvini boshqaradigan ilk somalilik hakam bo‘lishi kutilayotgandi.
Somali hukumati hakamning AQShga kirishiga ruxsat berilishi uchun AQSh va FIFA bilan muzokaralar olib borganini, biroq bu urinishlar samara bermaganini ma’lum qildi. Mamlakat Sport vazirligi Artanning xalqaro maydondagi yutuqlari Somali xalqi uchun faxr manbai ekanini ta’kidladi.
Reuters agentligiga ko‘ra, Somali rasmiylari hakamning turnirda ishtirok etishini ta’minlash bo‘yicha diplomatik sa’y-harakatlarni davom ettirmoqda.
FIFA esa immigratsiya va viza masalalari mezbon davlat vakolatiga kirishini bildirib, tashkilot bunday qarorlarni qabul qilish jarayonida ishtirok etmasligini ma’lum qildi. FIFA rasmiy saytida Artan qaysi uchrashuvni boshqarishi kerak bo‘lgani haqida ma’lumot berilmagan.
AQSh Bojxona va chegara nazorati xizmati ma’lum qilishicha, shanba kuni Istanbuldan Mayamiga kelgan Somali fuqarosi qo‘shimcha tekshiruvdan o‘tkazilgan va tekshiruv natijalari asosida mamlakatga kiritilmagan. Idora bunday qaror milliy xavfsizlik, huquqni muhofaza qilish va immigratsiya ma’lumotlari asosida har bir holat bo‘yicha alohida qabul qilinishini bildirgan.
OAV xabarlariga ko‘ra, 2025-yilda Afrikaning eng yaxshi erkak hakami deb topilgan Artanda AQShga kirish uchun amaldagi viza mavjud bo‘lgan.
Artanning o‘zi esa vaziyatga qaramay, hakamlik faoliyatini davom ettirish va kelajakdagi vazifalarga e’tibor qaratishini ma’lum qilgan.
