Himoyadagi xatolardan ko‘ra jamoamizdagi ijobiy jihatlarni ko‘proq ko‘rdim — Fabio Kannavaro

 

O‘zbekiston milliy terma jamoasi bosh murabbiyi Fabio Kannavaro Niderlandiyaga qarshi o‘rtoqlik uchrashuvidan so‘ng jamoa o‘yini yuzasidan o‘z fikrlarini bildirib o‘tdi.

 

Mutaxassisning ta’kidlashicha, jamoa kuchli raqibga qarshi maydonda ko‘plab ijobiy jihatlarni namoyish eta olgan.

 

“Hisob 1:0 bo‘lgan vaziyatda ham futbolchilarimiz o‘yin tartibini yo‘qotmadi. Jamoa bo‘lib harakat qilishda davom etdik va bahs oxirigacha kurashdik. Bunday darajadagi terma jamoalarga qarshi o‘ynash oson emas, biroq uchrashuv davomida ko‘plab ijobiy jihatlarni ko‘rdim”, — degan murabbiy.

 

Kannavaro bunday uchrashuvlar futbolchilar uchun muhim tajriba maktabi ekanini ta’kidlab, kuchli raqiblarga qarshi bahslarda jamoa yangi saboqlar olishini qayd etgan.

 

Himoyadagi xatolar haqida fikr bildirgan mutaxassis futbolni xatolarsiz tasavvur qilib bo‘lmasligini aytdi.

 

“Futbolda xatolar bo‘lib turadi. Bu normal holat. Bizning vazifamiz futbolchilarga bunday xatolar sonini kamaytirishda yordam berishdir. Ammo rostini aytsam, bugun himoyadagi kamchiliklardan ko‘ra jamoamizdagi ijobiy jihatlarni ko‘proq ko‘rdim”, — dedi u.

 

Shuningdek, bosh murabbiy jamoaning jismoniy tayyorgarligi bo‘yicha olib borilgan ishlardan qoniqish hosil qilganini ma’lum qilgan. Uning so‘zlariga ko‘ra, tayyorgarlik jarayoni bir oydan ortiq davom etgan, legioner futbolchilar esa keyinroq yig‘inga qo‘shilgan.

 

“Jismoniy tayyorgarlik borasida yaxshi ish olib borganimizga ishonaman. Albatta, ayrim futbolchilar bilan bog‘liq hal etilishi kerak bo‘lgan masalalar mavjud va biz bu yo‘nalishdagi ishlarni davom ettiramiz”, — deya qo‘shimcha qilgan Kannavaro.