Istanbulda 6 yoshli o‘zbekistonlik bola tramvay va bekat orasida qolib, halok bo‘ldi
Bolakay Turkiyaga ota-onasi va yaqinlari bilan birga sayohat uchun kelgan.
Turkiyaning Istanbul shahrida sodir bo‘lgan baxtsiz hodisa oqibatida 6 yoshli O‘zbekiston fuqarosi vafot etdi. Bu haqda O‘zbekistonning Istanbul shahridagi Bosh konsulxonasi ma’lum qildi.
Ma’lumotlarga ko‘ra, hodisa 2026-yil 8-iyun kuni Istanbulning Fotih tumanidagi Laleli mavzesida joylashgan tramvay bekatida yuz bergan.
Qayd etilishicha, voyaga yetmagan bola tramvaydan tushganidan so‘ng bekat platformasi bilan tramvay relslari oralig‘ida qisilib qolgan. Transport vositasi harakatlanishi natijasida u og‘ir tan jarohatlari olib, voqea joyida vafot etgan.
Marhum Turkiyaga ota-onasi va yaqinlari bilan birga sayyoh sifatida kelgani aytilmoqda.
Hozirda Turkiya huquqni muhofaza qiluvchi organlari tomonidan hodisa yuzasidan tergov harakatlari olib borilmoqda.
O‘zbekistonning Istanbuldagi Bosh konsulxonasi marhumning oila a’zolari va yaqinlariga hamdardlik bildirib, ularga zarur konsullik-huquqiy yordam ko‘rsatilayotganini ma’lum qildi.
Shuningdek, diplomatik vakolatxona Istanbul kabi yirik shaharlarda jamoat transportidan foydalanishda voyaga yetmagan bolalarni nazoratsiz qoldirmaslik va ularning xavfsizligiga alohida e’tibor qaratishga chaqirdi.
