O‘zbekistonda chet elliklar uchun maxsus soliq rejimi joriy etiladi
Qonun loyihasi xorijiy investorlar va malakali mutaxassislarni rag‘batlantirishga qaratilgan.
Oliy Majlis Qonunchilik palatasi deputatlari xorijiy fuqarolar uchun maxsus soliq rejimini joriy etish hamda professional kadrlar tayyorlash tizimini takomillashtirishga qaratilgan qonun loyihasini birinchi o‘qishda ma’qulladi.
Qonun loyihasiga ko‘ra, chet el fuqarolariga maxsus soliq rejimi joriy etilishi rejalashtirilmoqda. Hujjatda bunday shaxslarni maxsus tartib asosida soliq rezidenti sifatida tan olish mexanizmi ham nazarda tutilgan.
Loyihaga muvofiq, xorijiy fuqarolar belgilangan miqdordagi to‘lovni amalga oshirishi, shuningdek, vakolatli bank yoki kripto-aktivlar aylanmasi bo‘yicha litsenziyaga ega platformalarda hisob ochishi lozim bo‘ladi.
Shuningdek, qonun loyihasi bilan maxsus soliq rejimidan foydalanuvchi xorijliklarning voyaga yetgan yaqin qarindoshlari O‘zbekiston hududidan tashqarida olgan daromadlarini soliqqa tortishdan ozod etish tartibini joriy etish taklif qilinmoqda.
Hujjatda dual ta’lim tizimini qo‘llab-quvvatlashga qaratilgan normalar ham o‘rin olgan. Jumladan, dual ta’lim asosida tahsil olayotgan xodimlar ish haqidan undiriladigan ijtimoiy soliq stavkasini ikki baravar kamaytirish taklif etilmoqda.
Deputatlar mazkur qonun loyihasi xorijiy investorlar va malakali mutaxassislarni jalb etish, investitsiya muhitini yanada yaxshilash, shuningdek, iqtisodiyotning turli tarmoqlari uchun zamonaviy bilim va ko‘nikmalarga ega kadrlar tayyorlashga xizmat qilishini ta’kidladi.
