O‘zbekistonda “voyenkomat” lar tugatiladi
16 yoshga to‘lgan o‘g‘il bolalar ID-karta asosida avtomatik harbiy hisobga olinadi.
O‘zbekistonda mudofaa ishlari organlari faoliyatini tubdan isloh qilish, “nol byurokratiya” tamoyilini joriy etish hamda harbiy hisobga olish jarayonlarini to‘liq raqamlashtirish bo‘yicha yangi tashabbuslar ilgari surilmoqda. Bu haqda Mudofaa vaziri Shuhrat Xolmuhammedov ma’lum qildi.
Taqdimot davomida 16 yoshga to‘lgan va ID-karta olgan o‘g‘il bolalar to‘g‘risidagi ma’lumotlarni Ichki ishlar vazirligining axborot tizimi orqali olish hamda ularni avtomatik tarzda harbiy hisobga qo‘yish tartibini joriy etish taklifi ma’qullandi.
Shuningdek, amaldagi tartibga ko‘ra mudofaa ishlari bo‘limlarida amalga oshiriladigan tibbiy komissiya jarayonlarini bekor qilib, ushbu ko‘riklarni tuman va shahar markaziy ko‘p tarmoqli poliklinikalarida o‘tkazish tizimiga o‘tish rejalashtirilmoqda.
Ushbu yangiliklar natijasida fuqarolar uchun xizmat ko‘rsatish jarayonlari soddalashtirilib, shaffof va raqamli tizim shakllantirilishi, ortiqcha byurokratik to‘siqlarga barham berilishi kutilmoqda.
Prezident tomonidan mazkur takliflar ma’qullanib, ularni tezkorlik bilan amaliyotga tatbiq etish yuzasidan tegishli topshiriqlar berildi.
