Sergelida kanalda oqib ketayotgan ikki qizaloqni temiryo‘l xodimi qutqarib qoldi
Xodimga “O‘zbekiston temir yo‘llari” AJ rahbariyati tomonidan tashakkurnoma, esdalik sovg‘asi hamda pul mukofoti topshirildi.
Toshkent shahrining Sergeli tumanida kanal oqimiga tushib qolgan ikki nafar qizaloq temiryo‘l xodimining tezkor harakati tufayli qutqarib qolindi.
Ma’lum qilinishicha, hodisa 9-iyun kuni “O‘zbekiston temir yo‘llari” AJning Toshkent mintaqaviy temir yo‘l uzeli filiali Toshkent temir yo‘l masofasi korxonasida faoliyat yurituvchi temir yo‘l sozlovchisi A’zam Ibrohimov xizmat vazifasini bajarayotgan paytda sodir bo‘lgan.
U Sergeli tumani hududidan oqib o‘tuvchi Qorasuv kanali yaqinida ish olib borayotgan vaqtida suv oqimida oqib ketayotgan va yordam so‘rab chaqirayotgan ikki qizaloqni ko‘rib qolgan. Shundan so‘ng temiryo‘lchi zudlik bilan kanalga tushib, kuchli oqim ta’sirida xavfli vaziyatga tushib qolgan bolalarni qutqarib qolgan.
Qayd etilishicha, A’zam Ibrohimovning jasorati va fidokorona harakati “O‘zbekiston temir yo‘llari” AJ rahbariyati tomonidan munosib baholanib, unga tashakkurnoma, esdalik sovg‘asi hamda pul mukofoti topshirilgan.
