Eron Minab maktabi qurbonlari xotirasiga bag‘ishlab yangi banknota chiqardi

Eron Markaziy banki Minab shahridagi Shajareh Tayyebeh boshlang‘ich maktabi tasvirlangan yangi banknotani muomalaga kiritdi. Bu haqda The New Region xabar berdi.

 

Rasmiy ma’lumotlarga ko‘ra, mazkur maktabga fevral oyida yuz bergan harbiy amaliyot chog‘ida berilgan zarba oqibatida kamida 175 kishi, jumladan ko‘plab bolalar halok bo‘lgan.

 

Voqea AQSh–Isroil urushi boshlangan 28-fevral kuni yuz bergan bo‘lib, AQSh tomonidan amalga oshirilgan zarba aslida Islom inqilobi qo'riqchilari korpusiga tegishli harbiy obyektni nishonga olgan, biroq u adashib yaqin atrofdagi maktabga tushgani aytilmoqda.

 

Hujum oqibatida halok bo‘lganlarning aksariyati 7–12 yoshdagi bolalar ekani bildirilgan.

 

Eron davlat televideniyesi IRIB ma’lumotiga ko‘ra, 100 ming toman (1 million rial) qiymatidagi yangi banknotada aynan ushbu maktab tasviri aks ettirilgan. Amaldagi iqtisodiy vaziyat va keskin inflyatsiya fonida mazkur summa 1 AQSh dollaridan ham kam qiymatga teng ekani qayd etilgan.

 

Mamlakat rasmiylari yillar davomida davom etayotgan sanksiyalar Eron iqtisodiyotiga jiddiy ta’sir ko‘rsatganini, milliy valyuta — rial esa sezilarli darajada qadrsizlanganini ta’kidlamoqda.

 

Tehron AQShning zarbasini keskin qoralab, uni inson huquqlarining jiddiy buzilishi sifatida baholagan va hodisa ataylab amalga oshirilgan deb hisoblashini bildirgan.

 

Human Rights Watch tashkiloti esa Minabdagi voqeani harbiy jinoyat sifatida tekshirishga chaqirib, maktabning harbiy obyektga yaqin joylashuvi uni hujum uchun qonuniy nishonga aylantirmasligini ta’kidlagan.

 

Eron tashqi ishlar vaziri Abbos Aroqchi BMT Inson huquqlari kengashida qilgan chiqishida ham bu hujum “tasodifiy xato emas, balki ataylab amalga oshirilgan harakat” ekanini iddao qilib, AQShni javobgarlikka tortish zarurligini aytgan.