TIV Jahon chempionatiga borayotgan o‘zbekistonlik muxlislarga tavsiyalar berdi
TIV muxlislarni mezbon davlatlar qonun-qoidalariga rioya qilishga, hujjatlarni oldindan rasmiylashtirishga va xavfsizlik choralariga amal qilishga chaqirdi.
O‘zbekiston Tashqi ishlar vazirligi 2026 yilgi futbol bo‘yicha Jahon chempionatini tomosha qilish uchun AQSH, Kanada va Meksikaga safar qilishni rejalashtirayotgan fuqarolarga qator tavsiyalar bilan chiqdi.
Vazirlik matbuot kotibi Omonulla Fayziyevning ma’lum qilishicha, safar oldidan mezbon davlatlarning viza va migratsiya talablarini sinchiklab o‘rganish, barcha zarur hujjatlarni o‘z vaqtida rasmiylashtirish hamda ularning amal qilish muddatini tekshirish tavsiya etiladi.
Shuningdek, muxlislardan pasport va boshqa muhim hujjatlarning asl nusxalari bilan birga elektron va qog‘oz nusxalarini ham saqlash, mahalliy qonunchilik va jamoat tartibi qoidalariga qat’iy rioya qilish so‘ralgan.
TIV safar davomida harakatlanish marshrutlarini oldindan rejalashtirish, faqat rasmiy transport va axborot xizmatlaridan foydalanish, gavjum joylarda shaxsiy xavfsizlik choralariga amal qilish hamda ruxsat etilmagan ommaviy tadbirlarda ishtirok etmaslikni tavsiya qilgan.
Qayd etilishicha, favqulodda vaziyatlar, hujjatlar yo‘qolishi yoki boshqa muammolar yuzaga kelganda mahalliy tezkor xizmatlar hamda O‘zbekistonning AQSHdagi diplomatik vakolatxonalariga murojaat qilish lozim.
Vazirlik muxlislarni milliy terma jamoani munosib qo‘llab-quvvatlashga, mezbon mamlakatlar qonun-qoidalari, mahalliy an’ana va madaniyatga hurmat bilan munosabatda bo‘lishga chaqirdi. TIVga ko‘ra, Jahon chempionati davrida har bir o‘zbekistonlik nafaqat muxlis, balki mamlakatning xorijdagi vakili sifatida ham e’tibor markazida bo‘ladi.
Shuningdek, Tashqi ishlar vazirligi fuqarolarning xavfsizligi va qonuniy manfaatlarini himoya qilish masalalari doimiy nazoratda ekanini hamda zarur hollarda konsullik-huquqiy yordam ko‘rsatishga tayyorligini bildirdi.
