Toshkent viloyatida 10 kg kumushni noqonuniy sotmoqchi bo‘lgan shaxs ushlandi
Musodara qilingan kumushning umumiy qiymati 235 million 229 ming so‘mni tashkil etadi.
Toshkent viloyatining Zangiota tumanida qimmatbaho metallarning noqonuniy muomalasiga chek qo‘yildi. Bu haqda Davlat xavfsizlik xizmati Zamon.uz'ga ma’lum qildi.
Qayd etilishicha, DXX, Iqtisodiy jinoyatlarga qarshi kurashish departamenti hamda Bojxona organlari hamkorligida o‘tkazilgan tezkor tadbir davomida Toshkent shahrida yashovchi, 1992-yilda tug‘ilgan fuqaro 13 dona quyma bo‘lakdan iborat jami 10 kilogramm 35 gramm kumushni 20,8 ming AQSH dollariga sotayotgan vaqtida ashyoviy dalillar bilan qo‘lga olingan.
Mutaxassislar xulosasiga ko‘ra, musodara qilingan kumushning umumiy qiymati 235 million 229 ming so‘mni tashkil etadi.
Tergovga qadar tekshiruv jarayonida ushbu fuqaro zargarlik buyumlari ishlab chiqarish bilan shug‘ullanuvchi MCHJ xodimi ekani aniqlangan. Korxonada oltin va kumush mahsulotlariga qayta ishlov berilgani, biroq qimmatbaho metallarni affinaj qilish faoliyatini amalga oshirish uchun tegishli ruxsat mavjud emasligi ma’lum bo‘lgan.
Shuningdek, tekshiruv davomida ushbu manzilda umumiy qiymati 3 milliard 483 million so‘mlik 58 kilogramm kumush hamda 2,2 kilogramm oltin saqlanayotgani aniqlangan.
Hozirda mazkur holat yuzasidan jinoyat ishi qo‘zg‘atilib, tergov harakatlari olib borilmoqda.
