Andijondagi fojiada halok bo‘lganlar poliklinikaning texnik xodimlari ekani ma’lum qilindi
Xodimlar oqova va chiqindi suvlar to‘planadigan bunkerda tozalash hamda ta’mirlash ishlarini olib borish vaqtida zaharli gaz ta’siriga uchragan.
Ijtimoiy tarmoqlarda Andijon viloyatining Marhamat tumanidagi tibbiyot birlashmasida 4 nafar poliklinika xodimi halok bo‘lgani haqida xabarlar tarqaldi. Ma’lum qilinishicha, hodisa oqibatida vafot etganlar tibbiyot xodimlari emas, balki muassasaning texnik xodimlari bo‘lgan.
Viloyat hokimligi matbuot xizmati ma’lumotlariga ko‘ra, 10-iyun kuni Marhamat tuman tibbiyot birlashmasiga qarashli muassasa hududida texnik xodimlar oqova va chiqindi suvlar to‘planadigan bunkerda tozalash hamda ta’mirlash ishlarini olib borish vaqtida zaharli gaz ta’siriga uchragan. Oqibatda 4 nafar xodim voqea joyida vafot etgan.
Hodisa haqida tegishli xizmatlarga xabar berilgach, qutqaruvchilar voqea joyiga yetib kelib, marhumlarning jasadlarini bunker ichidan olib chiqqan.
Viloyat hokimligi ma’lumotiga ko‘ra, marhumlarning oila a’zolariga hamdardlik bildirilgan va dafn marosimlarini tashkil etish bilan bog‘liq zarur choralar ko‘rilgan.
Bosh prokuratura matbuot xizmatining ma’lum qilishicha, mazkur holat yuzasidan jinoyat ishi qo‘zg‘atilgan.
