Fabio Kannavaro JCH2026’da eng yuqori maosh oluvchi murabbiylar beshligiga kirdi
Jahon chempionatida eng ko‘p maosh oluvchi murabbiylar ro'yxatini e'lon qilindi.
O‘zbekiston milliy terma jamoasi bosh murabbiyi Fabio Kannavaro 2026-yilda AQSh, Kanada va Meksikada bo‘lib o‘tadigan FIFA Jahon chempionatida eng ko‘p maosh oluvchi murabbiylar qatoridan joy oldi.
Finance Football nashri tomonidan e’lon qilingan reytingga ko‘ra, italiyalik mutaxassis yiliga taxminan 4 million yevro maosh oladi va Portugaliya terma jamoasi bosh murabbiyi Roberto Martines bilan beshinchi o‘rinda turibdi.
Reytingning birinchi o‘rnini Braziliya terma jamoasi bosh murabbiyi Karlo Anchelotti egallagan bo‘lib, uning yillik maoshi 10 million yevroni tashkil etadi. Ikkinchi o‘rinda Germaniya terma jamoasi bosh murabbiyi Yulian Nagelsmann (7 million yevro), uchinchi o‘rinda esa AQSh terma jamoasi murabbiyi Maurisio Pochettino (6 million yevro) qayd etilgan.
To‘rtinchi o‘rinni Angliya terma jamoasi bosh murabbiyi Tomas Tuxel egallagan bo‘lib, uning maoshi 5,8 million yevroni tashkil qiladi.
Shuningdek, kuchli o‘ntalikka Fransiya (Didye Desham), Niderlandiya (Ronald Kuman), Urugvay (Marselo Byelsa), Kanada (Jessi March), Meksika (Xaver Agirre) va Paragvay (Gustavo Alfaro) terma jamoalari murabbiylari ham kiritilgan.
Ma’lumot uchun, 2026-yilgi FIFA Jahon chempionati 11-iyun – 19-iyul kunlari AQSh, Kanada va Meksikada o‘tkaziladi va tarixda ilk bor 48 ta terma jamoa ishtirok etadi.
