Qozog‘iston Rossiya gazini O‘zbekistonga yetkazib berish hajmini oshirishga tayyorligini ma'lum qildi
Gazning yetkazib berish hajmini yiliga 11 milliard kubometrgacha oshirish imkoniyati ham muhokama qilinmoqda.
Qozog‘iston O‘zbekistonga Rossiya gazini yetkazib berish hajmini oshirish imkoniyati mavjudligini ma’lum qildi. Bu haqda Qozog‘iston energetika vaziri Yerlan Akkenjenov jurnalistlar bilan muloqot chog‘ida bildirib o‘tdi deb xabar beradi TASS.
Uning ta’kidlashicha, tranzit hajmlarini ko‘paytirish masalasi, avvalo, transport infratuzilmasi imkoniyatlariga bog‘liq. Vazirning qayd etishicha, Qozog‘iston tomoni bu borada zarur texnik imkoniyatlariga ega hamda qo‘shimcha gaz tranzitini ta’minlashga tayyor.
“Qozog‘iston tomonida bunga hamma narsa tayyor. Hozir Rossiya va O‘zbekiston o‘rtasida ushbu masala bo‘yicha muzokaralar olib borilmoqda. Biz tranzit davlat sifatida gaz tashishni ta’minlashga tayyormiz”, — degan Akkenjenov.
Vazirning so‘zlariga ko‘ra, istiqbolda Rossiya gazining O‘zbekistonga yetkazib berish hajmini yiliga 11 milliard kubometrgacha oshirish imkoniyati ham muhokama qilinmoqda.
Avvalroq Rossiya Bosh vaziri o‘rinbosari Aleksandr Novak ham Rossiya, Qozog‘iston va O‘zbekiston o‘rtasida gaz infratuzilmasini kengaytirish hamda qo‘shimcha gaz yetkazib berish bo‘yicha muzokaralar davom etayotganini ma’lum qilgan edi.
