Rossiyada migrantlar uchun majburiy tibbiy ko‘rik 90 kundan 30 kungacha qisqartirildi
Putin migrantlarni tibbiy nazorat qilish bo‘yicha yangi qonunni imzoladi.
Rossiya Prezidenti Vladimir Putin noqonuniy migratsiyaga qarshi kurashish hamda mehnat migrantlarining sog‘lig‘i ustidan nazoratni kuchaytirishga qaratilgan yangi qonunni imzoladi.
Yangi tartibga ko‘ra, Rossiyaga kirib kelgan xorijiy fuqarolar va mehnat migrantlari xavfli yuqumli kasalliklar, OIV infeksiyasi hamda giyohvand moddalarni iste’mol qilish holatlari bo‘yicha tibbiy ko‘rikdan 30 kun ichida o‘tishi shart bo‘ladi. Avval ushbu muddat 90 kun etib belgilangan edi.
Shuningdek, Rossiya hududida 30 kundan ortiq muddat qoladigan migrantlar har yili majburiy tibbiy tekshiruvdan o‘tkazilishi nazarda tutilgan.
Qonunga muvofiq, tibbiy ko‘rik xarajatlari migrantlarning o‘zlari yoki ularni ishga qabul qilayotgan ish beruvchilar tomonidan qoplanadi. Bundan tashqari, migrantlarni tibbiy tekshiruvdan o‘tkazishda vositachilar ishtirokiga chek qo‘yilib, ushbu xizmatlarni faqat vakolatli tashkilotlar amalga oshirishi mumkin bo‘ladi.
Yangi tartib vaqtinchalik yashash guvohnomasi, ishlash uchun ruxsatnoma olish yoki uni uzaytirish jarayonlarida ham tibbiy ko‘rikdan o‘tishni majburiy talab sifatida belgilaydi.
Tibbiy tekshiruv natijalari elektron shaklda rasmiylashtirilib, Yagona davlat sog‘liqni saqlash axborot tizimiga kiritiladi. Agar migrantda xavfli kasalliklar, OIV infeksiyasi yoki giyohvand moddalar iste’moli aniqlansa, tegishli tibbiyot muassasalari bu haqda 24 soat ichida Ichki ishlar vazirligi va sanitariya nazorati organlariga ma’lumot taqdim etadi.
Ma’lum qilinishicha, mazkur qonun 2026-yil 1-sentabrdan kuchga kiradi.
